Հեղինակավոր ինսայդեր Ֆաբրիցիո Ռոմանոն հայտնել է մի շարք նշանակալի տեղափոխությունների մասին, որոնք կարող են ազդել եվրոպական թոփ-ֆուտբոլի ընթացքի վրա։
«Լիվերպուլը» ձեռք է բերում Ալեքսանդեր Իսակին՝ սահմանելով ԱՊԼ-ի տրանսֆերային ռեկորդ
«Լիվերպուլը» համաձայնության է հասել «Նյուքասլի» հետ հարձակվող Ալեքսանդեր Իսակի տեղափոխության վերաբերյալ։ Տրանսֆերի արժեքը կկազմի 130 միլիոն ֆունտ (150 միլիոն եվրո), ինչը դարձնում է այն Անգլիայի Պրեմիեր լիգայի (ԱՊԼ) պատմության ամենաթանկ տրանսֆերը։ Իսակը սեպտեմբերի 1-ին կանցնի բժշկական զննություն՝ նախքան երկարաժամկետ պայմանագրի ստորագրումը, որը համաձայնեցվել էր դեռևս մի քանի ամիս առաջ։ Մինչ այս, ԱՊԼ-ի պատմության ամենաթանկ ձեռքբերումը Ֆլորիան Վիրցն էր, որը ընթացիկ տրանսֆերային պատուհանի ընթացքում «Բայերից» «Լիվերպուլ» էր տեղափոխվել 125 միլիոն եվրոյով։ Իսակը «Նյուքասլում» հանդես է գալիս 2022 թվականից՝ անցկացնելով 109 հանդիպում, խփելով 62 գոլ և կատարելով 11 գոլային փոխանցում։
«Մանչեսթեր Սիթին» ձեռք բերեց Ջանլուիջի Դոնարումային
«Մանչեսթեր Սիթին» պայմանագիր է կնքել ՊՍԺ-ի դարպասապահ Ջանլուիջի Դոնարումայի հետ՝ վճարելով 39 միլիոն եվրո։ 26-ամյա իտալացին ՊՍԺ-ում հանդես էր գալիս 2021 թվականից, և նրա պայմանագիրը գործում էր մինչև 2026 թվականի հունիսի 30-ը։ Անցած մրցաշրջանում Դոննարուման մասնակցել է 47 խաղի, բաց թողել 43 գոլ և 17 անգամ պահել դարպասը «չոր»։ Transfermarkt-ը նրա շուկայական արժեքը գնահատում է 40 միլիոն եվրո։
Անտոնին տեղափոխվում է «Բետիս»
«Մանչեսթեր Յունայթեդը» համաձայնեցրել է բրազիլացի հարձակվող Անտոնիի տեղափոխությունը իսպանական «Բետիս»՝ 22 միլիոն եվրոյի դիմաց։ Գործարքը կարող է ներառել ևս 3 միլիոն եվրո բոնուսներ՝ կախված խաղացողի արդյունքներից։ Բացի այդ, «Մանչեսթեր Յունայթեդը» կստանա Անտոնիի հաջորդ վաճառքի 50%-ը։ 25-ամյա Անտոնին անցած մրցաշրջանում վարձավճարով հանդես էր գալիս «Բետիսում», որտեղ անցկացրել է 26 խաղ, խփել 9 գոլ և կատարել 5 գոլային փոխանցում։
«Յուվենտուսը» ձեռք բերեց Լուիս Օպենդային
«Յուվենտուսը» պայմանագիր է կնքել «Լայպցիգի» հարձակվող Լուիս Օպենդայի հետ՝ վճարելով 40 միլիոն եվրո, ներառյալ բոնուսները։ 25-ամյա բելգիացին «Լայպցիգում» հանդես էր գալիս 2023 թվականից՝ անցկացնելով 93 խաղ, խփելով 41 գոլ և կատարելով 18 գոլային փոխանցում։ Նրա պայմանագիրը գերմանական ակումբի հետ գործում էր մինչև 2028 թվականը։
«Ֆեներբահչեն» ձեռք է բերում Էդերսոնին
«Ֆեներբահչեն» համաձայնության է հասել «Մանչեսթեր Սիթիի» հետ դարպասապահ Էդերսոնի տեղափոխության վերաբերյալ։ Գործարքը վերջնականապես համաձայնեցված է, և բրազիլացի դարպասապահի տրանսֆերի մասին բանավոր պայմանավորվածություն է ձեռք բերվել։ Գործարքի արժեքը կազմում է մոտ 13-14 միլիոն եվրո։ Էդերսոնը «Մանչեսթեր Սիթիում» հանդես է գալիս 2017 թվականից, և նրա պայմանագիրը գործում է մինչև 2026 թվականի ամառ։ Ընթացիկ մրցաշրջանի Անգլիայի Պրեմիեր լիգայի մեկնարկային երկու խաղերում «քաղաքաբնակների» դարպասը պաշտպանել է Ջեյմս Թրաֆորդը։
