ՊՍԺ-ն փորձել է հեռացնել թիմի մարոկկացի պաշտպան Աշրաֆ Հակիմիի՝ ֆրանսիական Canal+ հեռուստաալիքին տված հարցազրույցի մի հատվածը։ Ակումբին դուր չի եկել այն մասը, որտեղ խաղացողն ասել է, որ արժանի է «Ոսկե գնդակին», քանի որ գոլ է խփել Չեմպիոնների լիգայի քառորդ եզրափակիչում, կիսաեզրափակիչում և եզրափակիչում՝ լինելով պաշտպանողական խաղացող։
Նշվում է, որ փարիզյան գրանդը «Ոսկե գնդակի» մրցանակի համար պայքարում ակնհայտորեն աջակցում է իր հարձակվող Ուսման Դեմբելեի թեկնածությանը, միաժամանակ չառարկելով, որ թիմի մեկ այլ խաղացող ստանա այն։
Այնուամենայնիվ, Հակիմիի խոսքերը համարվել են սադրիչ, սակայն հարցազրույցը խմբագրել հնարավոր չի եղել, քանի որ մարոկկացին ինքն է դեմ արտահայտվել դրան։ Նրա կարծիքով՝ ինքը բոլոր իրավունքներն ունի հրապարակայնորեն հայտարարելու մրցանակի նկատմամբ իր հավակնությունների մասին, հաղորդում է L’Équipe-ը։
Ակումբը շտապել է նշել, որ այս ամբողջ իրավիճակը ոչ մի ազդեցություն չի ունեցել թիմում տիրող մթնոլորտի վրա։
