🎥 Ուսիկը նոկաուտով հաղթեց Դյուբուային՝ նվաճելով ծանր քաշային կարգի բացարձակ չեմպիոնի կոչումը

Ուկրաինացի բռնցքամարտիկ Ալեքսանդր Ուսիկը հաղթանակ տարավ բրիտանացի Դանիել Դյուբուայի նկատմամբ՝ ծանր քաշային կարգում աշխարհի բացարձակ չեմպիոնի տիտղոսի համար մենամարտում։

Մենամարտը կայացավ Լոնդոնի «Ուեմբլի» մարզադաշտում և ավարտվեց հինգերորդ ռաունդում՝ Ուսիկի նոկաուտով։

Ուսիկը պաշտպանեց իր WBA, IBO, WBO և WBC տիտղոսները և կրկին նվաճեց IBF-ի գոտին՝ դառնալով ծանր քաշային կարգում բացարձակ չեմպիոն։

Սա Ուսիկի և Դյուբուայի երկրորդ մենամարտն էր։ 2023 թվականին Ուսիկը նույնպես հաղթել էր Դյուբուային՝ իններորդ ռաունդում նոկաուտով։

38-ամյա Ուսիկը պրոֆեսիոնալ կարիերայում անցկացրել է 24 մենամարտ և բոլորում հաղթանակ տարել, որից 15-ը՝ նոկաուտով։ 2024 թվականի մայիսին նա հաղթել էր բրիտանացի Թայսոն Ֆյուրիին՝ դառնալով վերջին 25 տարվա ընթացքում ծանր քաշային կարգում առաջին բացարձակ աշխարհի չեմպիոնը։ Հետագայում նա հրաժարվել էր IBF-ի գոտուց՝ խորվաթ Ֆիլիպ Հրգովիչի դեմ պարտադիր պաշտպանություն չանցկացնելու պատճառով։ Դյուբուան ավելի ուշ տեխնիկական նոկաուտով հաղթել էր Հրգովիչին և նվաճել թափուր IBF տիտղոսը։

27-ամյա Դյուբուայի ակտիվում կա 25 մենամարտ՝ 22 հաղթանակ (21՝ նոկաուտով) և 3 պարտություն։