ՈւԵՖԱ Չեմպիոնների լիգայի որակավորման առաջին փուլի շրջանակում Հայաստանի Չեմպիոն «Նոան» ուժերը կչափի Պոդգորիցայի «Բուդուչնոստի» հետ։ Խաղից առաջ մրցակցի հարձակվող Իգոր Իվանովիչը կիսվել է իր սպասումներով։
«Մենք մեկնում ենք լավ պատրաստված և առանց վնասվածքներ ունեցող խաղացողների, ինչը կարևոր առավելություն է: Վերջին օրերին լսել ենք կարծիքներ, թե «Նոան» մեզանից տասն անգամ ուժեղ է, բայց ես այդ կարծիքի հետ համաձայն չեմ: Մենք մանրակրկիտ վերլուծել ենք նրանց խաղը. ճիշտ է, նրանք ավելի որակյալ կազմ ունեն, բայց դա չի նշանակում, որ անպարտելի են:
Մենք ևս ունենք մեր ուժեղ կողմերը և մեկնում ենք Երևան՝ ոչ թե հանձնվելու, այլ պայքարելու մտադրությամբ: Մեր մարզումներն ու պատրաստությունն այդ նպատակն են հետապնդում։
Նրանց հարձակումը շատ հզոր է, հատկապես, երբ 5-6 խաղացող միաժամանակ ներգրավվում է գրոհներում: Սակայն դա կարող է բացեր ստեղծել նրանց պաշտպանությունում: Եթե այդպիսի հնարավորություն ընձեռվի, մենք պատրաստ ենք օգտվել դրանից: Մենք ունենք մեր ռազմավարությունը և հույս ունենք, որ այդ բացերը կօգնեն մեզ սպառնալ «Նոային»։
Ամեն ինչ կախված է մեզանից: Մենք պետք է լինենք կոշտ, ագրեսիվ և համախմբված: Խոսում ենք միմյանց հետ և հասկանում, որ խաղադաշտում պետք է աննահանջ պայքար մղենք՝ տուն դրական արդյունք բերելու համար։
Եթե Հայաստանից լավ արդյունք բերենք, վստահ եմ՝ մեր մարզադաշտը լեփ-լեցուն կլինի: Երկրպագուները կգան՝ պարգևատրելու մեզ մեր պայքարի և էներգիայի համար: Նրանց աջակցությունը մեզ լրացուցիչ ուժ և մոտիվացիա կտա՝ վերջապես հաղթահարելու Չեմպիոնների լիգայի որակավորման առաջին փուլի արգելքը: Դա մեր ընդհանուր երազանքն է, և հենց այդ պատճառով առաջին խաղն այդքան կարևոր է»,- Իվանովիչի խոսքն է մեջբերում «Բուդուչնոստի» պաշտոնական կայքը։
Թիմերի միջև առաջին հանդիպումը կկայանա հուլիսի 9-ին, ժամը 20:00-ին, Աբովյանի Վահագն Թումասյանի անվան մարզադաշտում։
