Լոնդոնի «Արսենալի» և «Նյուքասլ Յունայթեդի» նախկին ֆուտբոլիստներ Յան Ռայթն ու Ալան Շիրերը շփվել են BBC-ի եթերում:
Շիրերը, քննարկելով «զինագործների» անվանի մարզիչ Արսեն Վենգերի՝ անգլիական ֆուտբոլի վրա ունեցած ազդեցությունը, հիշել է «Նյուքասլի»՝ «Արսենալից» կրած պարտությունը Անգլիայի 1998 թ. Գավաթի եզրափակչում ու հարց ուղղել Ռայթին.
«Վենգերի գալուց հետո մենք շատ անգամներ էինք խաղում «Արսենալի» տարբեր կազմերի դեմ, և ամեն անգամ ես քեզ նայելով մի շարք հարցեր էի ունենում՝ «Ինչպե՞ս ես դու մարզավիճակ պահում, ինչի՞ հաշվին ես դու այդքան ուժեղ, ի՞նչ եք անում, ի՞նչ եք ընդունում, ի՞նչ է առհասարակ կատարվում»,- ասել է Շիրերը:
Ռայթը պատասխանել է. «Գիտե՞ս ինչ, Ալ: Առաջ մեզ վիտամինային ներարկումներ էին անում հենց ձեռքից: Ահա թե ինչ էր անում Արսեն Վենգերը: Նա էր քեզ հասցնում այն մակարդակին, որտեղ դու կայիր, կարելի է ասել՝ գագաթնակետին: В6, В12 վիտամիններ և մարզումներ. ահա թե նա ինչ էր անում»:
Շիրերն ընդհատել է Յանին՝ հասկանելով, որ նա գուցե ավելորդ բաներ խոսի. «Կարծում եմ՝ դու Արսենին տհաճությունների մեջ չես ներքաշի: Հիմա «Նյուքասլին» կտան Անգլիայի 1998 թվականի Գավաթը, քանի որ «Արսենալի» ֆուտբոլիստները դոպինգ են ընդունել»:
«Միայն հենց այդպես էլ դու կարող ես ստանալ Անգլիայի Գավաթը»,- ի պատասխան ասել է Ռայթը:
