«Ակրոնի» հարձակվող Արտյոմ Ձյուբան մեկնաբանել է Ռուսաստանի Պրեմիեր լիգայի 20-րդ տուրում «Կռիլյա Սովետովի» դարպասը խփած գոլը (2:0):
Այս գոլը 234-րդն էր Ձյուբայի կարիերայում՝ դարձնելով նրան ռուսական ֆուտբոլի պատմության լավագույն ռմբարկուն։ Նախկինում ռեկորդը պատկանում էր «Զենիթի» նախկին հարձակվող Ալեքսանդր Կերժակովին։
«Մի պահ ես քիչ էր մնում լաց լինեի, բայց զսպեցի։ Մեծ շնորհակալություն տղաներին նվիրվածության համար, հատկապես դարպասապահներին. Վասյուտան փրկեց առաջին խաղակեսը, հետո Վոլկովը: Տղաները գեղեցիկ էին»,- Ձյուբայի խոսքերն է փոխանցում Championat.com-ը:
36-ամյա ֆուտբոլիստը նաև հայտնել է, որ կցանկանար նորից հանդես գալ Ռուսաստանի ազգային հավաքականում, զգալ երկրի հիմնը:
Հիշեցնենք՝ Ձյուբան գլխավորել է ռուսական ֆուտբոլի պատմության լավագույն ռմբարկուների ցանկը, որում հաշվարկվում են ինչպես ակումբային մակարդակում, այնպես էլ ՝ ազգային հավաքականի կազմում խփած գոլերը:
Ընթացիկ մրցաշրջանում Ձյուբան «Ակրոնի» կազմում 13 հանդիպում է անցկացրել բոլոր մրցաշարերում՝ դառնալով 5 գոլի և երեք գոլային փոխանցման հեղինակ։ Ֆուտբոլիստի ներկայիս աշխատանքային պայմանագիրն ակումբի հետ ուժի մեջ է մինչև 2025 թվականի ամառը: Transfermarkt ինտերնետային պորտալում ներկայացված տեղեկատվության համաձայն՝ ֆուտբոլիստի շուկայական արժեքը կազմում է 1,8 մլն եվրո։
