«Մոնցայի» գործադիր տնօրեն Ադրիանո Գալիանին խոսել է կորոնավիրուսի համաճարակի պատճառով դադարեցված ֆուտբոլային մրցաշրջանն ավարտելու ձևաչափի մասին։
«Պետք է բոլոր առաջնություններն ավարտին հասցնել։ Ահա իմ առաջարկը․ անում ենք այնպես, ինչպես Հարավային Ամերիկայում՝ մրցաշրջանը տեղափոխում ենք օրացուցային տարի։ Մյուս մրցաշրջանը սկսում ենք 2021-ի փետրվարին, նույնն անում ենք 2022-ին։ Վստահ եմ՝ մի քանի տարուց լուծումը կգտնենք։
Այս մրցաշրջանը կխաղանք ամռանը՝ հուլիսին կամ օգոստոսին, երեկոյան ժամերին։ Հիանալի կլինի ավելի հաճախ ֆուտբոլ դիտել, քան մյուս ամիսներին։ Կարծում եմ՝ արդյունքում ավելի շատ հանդիսականներ կունենանք։
ՖԻՖԱ-ն արդեն ԱԱ-2022-ը տարվա վերջին է նշանակել, նույնն արեք նաև Եվրոպայի առաջնության ու Ամերիկայի Գավաթի հետ 2021-ին։
Չի կարելի ավարտին չհասցնել մրցաշրջանը, բայց դա պետք է անել այն ժամանակ, երբ ապահով կլինի։ Չեմ հասկանում ավելի վաղ վերադառնալու ցանկությունն ու նոր մրցաշրջանը սեպտեմբերին սկսելը, երբ այստեղ դեռ կարող է տարածվել վարակը։
Եթե առաջնությունները ավարտին չհասցվեն, ֆուտբոլի համար դա ուղղակի պայթյունավտանգ կլինի։ Առանց հանդիսականի խաղալը տխուր է, բայց ավելի լավ է այդպես, քան ընդհանրապես չխաղալ»,- Գալիանիի խոսքերն է փոխանցում La Gazzetta dello Sport-ը։