Իսպանիայի հավաքականի կազմում աշխարհի և Եվրոպայի չեմպիոն, «Բարսելոնայի» նախկին խաղացող Սեսկ Ֆաբրեգասը խոսել է կապտանռնագույնների 17-ամյա եզրային հարձակվող Լամին Յամալի՝ կատալոնական ակումբի լեգենդար հարձակվող Լիոնել Մեսսիի հետ համեմատություններին:
«Ես կարո եմ հասկանալ այդ խոսակցությունները: Բայց դրանք ինձ իսկապես դուր չեն գալիս, քանի որ կարծում եմ, որ յուրաքանչյուր խաղացող անհատականություն է, և մենք յուրաքանչյուրս ունենք մեր պատմությունը: Եվ հիմա Լամինը պետք է իր սեփական ճանապարհը կերտի: Բայց հաստատ կան որոշ նշաններ, որոնք ստիպում են ձեզ հիշել, թե ինչպիսին է եղել Լեոն նախկինում: Կարծում եմ, որ սա միանգամայն նորմալ է, հատկապես «Բարսելոնայի» երկրպագուների համար, ովքեր նոր են անցել դժվարին շրջանի միջով։
Այսպիսով, ես կարծում եմ, որ աժիոտաժը, որն այս օրերին առաջացնում է Լամինը, մեծ նշանակություն ունի: Դա հիշեցնում է այն ժամանակները, երբ Լեոն սկսեց ավելի պայծառ փայլել, քան մնացածը: Եվ ես կարծում եմ, որ Լամինը երկար տարիներ «Բարսելոնայում» շատ, շատ լավ բաներ անելու ներուժ ունի:
Կարծում եմ՝ Լամինը յուրահատուկ տաղանդ է։ Նա մեկն է, որին պարզապես պետք է թույլ տալ դուրս գալ խաղադաշտ և խաղալ ֆուտբոլ: Նա կարողանում է կարդալ խաղը և հասկանալ, թե ինչ է պետք: Կարծում եմ՝ սա արդեն մեծ խաղացողի, շատ հասուն խաղացողի նշան է։ Իսկ ինձ ամենաշատը դուր է գալիս, որ նա խաղում է այնպիսի զգացողությամբ՝ կարծես ամեն ինչ կատարվում է փողոցում։ Թվում է, թե նրա մոտ ամեն ինչ հեշտ է ստացվում։ Նա ազատ է իր մտքերում»,- ESPN-ին ասել է Ֆաբրեգասը:
