Ֆուտբոլային սկաուտ․ Ատալանտա, Լացիո

Armsport-ը «Ֆուտբոլային Սկաուտ» շարքի շրջանակներում շարունակում է անդրադառնալ թոփ-5 լիգաների թիմերին։ Այս անգամ մեր հորիզոնում են Ա Սերիայի երկու ակումբների՝ «Ատալանտայի» և «Լացիոյի» ամենահեռանկարային ֆուտբոլիստները, ովքեր այս մրցաշրջանում զարմացրեցին շատերին իրենց խաղով։

Լուիս Ֆելիպե

🇧🇷 Բրազիլիա
«Լացիո» 
23 տարեկան

Բրազիլացի պաշտպանը բավականին հաջող մրցաշրջան է անցկացնում Ա Սերիայում։ Նա դարձել է «Լացիոյի» պաշտպանական գծի գլխավոր հենասյուներից մեկը։ Մյունխենի «Բավարիան» ցանկանում է իր կազմում տեսնել «արծիվների» պաշտպան Ֆելիպեին, «Բարսելոնան» նույնպես հետաքրքրված է 23-ամյա բրազիլացու ծառայություններով: Դա արդեն շատ բան է ասում։ Իր հերթին հռոմեական ակումբը որոշել է 2 միլիոնով բարձրացնել Ֆելիպեի աշխատավարձը ՝ փորձելով նրան պահել թիմում:

Ռոբին Գոսենս

🇩🇪 Գերմանիա
«Ատալանտա» 
25 տարեկան

Գոսենսը Ա Սերիայի ամենաարդյունավետ պաշտպանն է․ նրա հաշվին արդեն 7 խփած գնդակ կա։ Գերմանացին արդեն երրորդ մրցաշրջանն է անցկացնում «դիցուհիների» կազմում, իսկ մինչ այդ նա հանդես էր գալիս Էրեդիվիզիի համեստ ակումբներում։ Ամեն տարի Ռոբինը ավելացնում է իր խաղում և ներկա դրությամբ լավագույններից մեկն է իր դիրքում։ Եթե այսպես շարունակի, մենք նրան շուտով կտեսնենք և՛ որևէ գրանդ ակումբի կազմում, և՛ Գերմանիայի ազգայի հավաքականի մարզաշապիկով։

Լուիս Ալբերտո

🇪🇸 Իսպանիա
«Լացիո» 
27 տարեկան

12 գոլային փոխանցում․ սա լավագույն ցուցանիշն է Ա Սերիայում։ Իսպանացին, ով ժամանակին հանդիսացել է «Սևիլիայի» և «Լիվերպուլի» ֆուտբոլիստ, տեղափոխվել Ապենինյան թերակղզի, սկսել է բավականին արդյունվետ ֆուտբոլ ցուցադրել։ Նա ասես ճախրում է «արծիվների» երամում՝ գոլային պահեր ստեղծելով իր խաղընկերների համար։ Պատահական չէ, որ շատ գրանդ ակումբների համար Լուիսը դարձել է առաջիկա տրանսֆերային պատուհանի ամենբաղձալի նպատակներից մեկը։

Մարիո Պաշալիչ

🇭🇷 Խորվաթիա
«Ատալանտա» 
25 տարեկան

«Չելսիում» հույս չդրեցին երիտասարդ ֆուտբոլիստի վրա՝ նրան ուղարկելով գործուղման «Միլան» ,իսկ հետո Մոսկվա՝ «Սպարտակ»։ Այնտեղ նա անցկացրեց ոչ վատ մրցաշրջան, սակայն ՌՊԼ-ի աստղ դառնալ նրան ևս չհաջողվեց, որից հետո «Չելսին» որոշեց ևս երկու մրցաշրջան վարձավճարով խորվաթ ֆուտբոլիստին ուղարկել կրկին Ա Սերիա։ «Ատալանտան» կարծես թե այն ակումբն է, որը լիովին համապատասխանում է Մարիոյին։ Հիանալի մրցաշրջանից հետո, Լոնդոնում լուրջ կխորհեն՝ վերադարձնել Պաշալիչին, թե համաձայնվեն նրա ամբողջական տրանսֆերը վաճառել «դիցուհիներին»։

Սերգեյ Միլենկովիչ-Սավիչ

Սերբիա
«Լացիո» 
25 տարեկան

Միլինկովիչ-Սավիչը ծնվել է Լլեյդայում, Իսպանիա, սպորտային ընտանիքում։ Նրա հայրը՝ Նիկոլա Միլինկովիչը ֆուտբոլիստ էր, իսկ մայրը՝ Միլանա Սավիչը պրոֆեսիոնալ բասկետբոլիստ։ Նրա փոքր եղբայրը՝ Վանյա Միլինկովիչ-Սավիչը նույնպես ֆուտբոլիստ է: Միլինկովիչ-Սավիչը ներկայացրել է Սերբիան տարբեր տարիքային երիտասարդական հավաքականներում։ 2013 թվականի նա մինչև 19 տարեկանների հավաքականի կազմում մասնակցեց Եվրոպայի առաջնությանը՝ անցկացնելով 4 հանդիպում և օգնելով Սերբիային հաղթել մրցաշարը։

2017-18 մրցաշրջանում Միլինկովիչ-Սավիչը «արծիվների» կազմում անցկացրեց 48 հանդիպում՝ դառնալով 14 գոլի ու 8 գոլային փոխանցման հեղինակ, և ընդգրկվելով Սերիա A-ի խորհրդանշական հավաքականում։ Դա նրա աստեղայի ժամն էր։ Բազմաթիվ գրանդ ակումբներ ցանկանում էին նրան տեսնել իրենց շարքերում, սակայն «Լացիոն» չվաճառեց ֆուտբոլիստին՝ ցանկանալով ստանալ աստղաբաշխական գումար նրա տրանսֆերի դիմաց (100-150 մլն եվրո)։ Այնուհետև մեր հերոսի մոտ սկսվեց դիտարկվել ոչ մեծ խաղային անկում․ կարծես թե նրա նկատմամբ հեաքրքրությունը սկսեց քիչ-քիչ նվազել․․․

Սակայն այս մրցաշրջանում սերբ ֆուտբոլիստը նորից վերադարձրել է իր նախկին մարզավիճակը և իր մեծ ներդրումն ունի «Լացիոյի» ներկայիս հաջողություններում։ Չիրո Իմոբիլեն, ում մենք առանձին արդեն անդրադարձել էինք, մեր այսօրվա մյուս հերոսները՝ Ֆելիպեն և Ալբերտոն, ինչպես նաև Միլինկովիչ-Սավիչը, կարող են իրենց թիմին դարձնել ֆուտբոլային աշխարհի այս տարվա ամենամեծ սենսացիաներից մեկը։ Մնում է սպասել մրցաշարջանի վերսկսմանը, որը, հուսանք, սարերի ետևում չէ․․․

Վար Բաբայան

Շարքի նախորդ մասերը

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)

Պորտուգալիան՝ ցատկահարթակ դեպի մեծ ֆուտբոլ

Բելգիան շարունակում է մնալ ապագա աստղերի դարբնոց (Մաս 2)

Բելգիան շարունակում է մնալ ապագա աստղերի դարբնոց (Մաս 1)

Սամուրայների նոր սերունդը Եվրոպայում

Բրազիլիայի առաջնության ամենահեռանկարային ֆուտբոլիստները (Մաս 2)

Բրազիլիայի առաջնության ամենահեռանկարային ֆուտբոլիստները (Մաս 1)

MLS-ի 7 ֆուտբոլիստներ, ովքեր կարող են փայլել Հին աշխարհում

Նոր անուններ Արգենտինայից