Սեպտեմբերի 7-ին կայացել է ՀՖՖ կարգապահական և էթիկայի կոմիտեի նիստը, որի արդյունքներով կայացվել են մի շարք որոշումներ մասնավորապես «Շիրակ» ակումբի վերաբերյալ։
Տարբեր որոշումներով Գյումրիի թիմն ընդհանուր առմամբ տուգանվել է 3 մլն 400 հազար դրամով։
Տուգանքների առյուծի բաժինը «Շիրակը» ստացել է օգոստոսին 26-ին Գյումրիում «Ուրարտուի» հետ կայացած խաղի արդյունքներով (0:2)։
Մասնավորապես, ըստ արձանագրության «Շիրակ ՖԱ» աշխատակից Սուրեն Սիմոնյանը ներխուժել է խաղադաշտ, հայհոյել է խաղի չորրորդ պաշտոնյային և հարվածելու փորձ է կատարել։ Սիմոնյանը 6 ամիս ժամկետով զրկվել է իր ծառայողական պարտականությունները կատարելու իրավունքից՝ սկսած 2023 թվականի նոյեմբերի 18-ից՝ հաշվի առնելով նշված ֆուտբոլային սուբյեկտի՝ ծառայողական պարտականությունները կատարելու իրավունքից զրկված լինելու հանգամանքը, իսկ «Շիրակ ՖԱ» ՀԿ-ն տուգանվել է նվազագույն աշխատավարձի հազարհինգհարյուրապատիկի՝ 1,500,000 ՀՀ դրամի չափով։
«Շիրակ» թիմի ադմինիստրատոր Ժորա Սիմոնյանի կողմից մրցավարին հարվածելու փորձ կատարելու, իսկ «Շիրակ» թիմի ֆուտբոլիստ Լյովա Կարապետյանի կողմից չորրորդ պաշտոնյային հարվածելու փորձ կատարելու համար Սիմոնյանն ու Կարապետյանը որակազրկվել են 3-ական խաղերով, իսկ Գյումրիի թիմը 300 հազարական դրամով է տուգանվել։
«Շիրակ» թիմի՝ մամուլի ասուլիսին չմասնակցելու համար «Շիրակ ՖԱ» ՀԿ-ն տուգանվել է նվազագույն աշխատավարձի երկուհարյուրապատիկի՝ 200,000 ՀՀ դրամի չափով։
«Շիրակ» թիմի երկրպագուների կողմից խաղը սպասարկող մրցավարների հասցեին անհարգալից արտահայտություններ թույլ տալու, «Շիրակ» թիմի երկրպագուների կողմից չորրորդ պաշտոնյայի ուղղությամբ խաղադաշտ իրեր նետելու և ակումբի կողմից մարզադաշտում կարգուկանոնը չապահովելու համար թիմը տուգանվել է ևս 500 հազար դրամով։
Խաղի վերաբերյալ ամբողջական արձանագրությանը կարող եք ծանոթանալ այստեղ։
Այնուհետև, օգոստոսի 5-ին կայացած «Վան»-«Շիրակ» (1:0) խաղի արդյունքներով «Շիրակ ՖԱ»-ն տուգանվել է նվազագույն աշխատավարձի երեքհարյուրապատիկի՝ 300,000 ՀՀ դրամի չափով՝ «Շիրակ» թիմի երկրպագուների կողմից մրցավարների հասցեին վիրավորական արտահայտություններ թույլ
տալու համար։
Օգոստոսի 31-ին կայացած «Շիրակ»-«Ալաշկերտ» (2:3) խաղի արդյունքներով «Շիրակ ՖԱ»-ն տուգանվել է նվազագույն աշխատավարձի երեքհարյուրապատիկի՝ 300,000 ՀՀ դրամի չափով՝ դարձյալ թիմի երկրպագուների կողմից մրցակից թիմի գլխավոր մարզչի հասցեին վիրավորական արտահայտություններ և հայհոյանքներ թույլ տալու համար։
Թիմը 3 (երեք) օրվա ընթացքում կարող է բողոքարկել ՀՖՖ կարգապահական և էթիկայի կոմիտեի որոշումները։
