Մխիթարյանի տպավորիչ արդյունքը, Միլանի վստահությունը, Ռեալի և Սիթիի սառնասրտությունը․ ՉԼ-ի քառորդ եզրափակիչի ամփոփում

Չեմպիոնների լիգայի քառորդ եզրափակիչ փուլն ավարտվեց առանց անակնկալների։ Կիսաեզրափակիչում «Ռեալը» կմրցի «Մանչեսթեր Սիթիի» հետ, իսկ մյուս զույգը կկազմեն Միլանի 2 գիգանտները՝ «Միլանը» և «Ինտերը»։

Քառորդ եզրափակիչի գրեթե բոլոր դիմակայություններում հաղթեցին ֆավորիտները։ Միայն իտալական թիմերի պայքարն էր, որտեղ վառ ընդգծված ֆավորիտ չկար։ Armsport-ն անդրադարձել է ՉԼ-ի քառորդ եզրափակիչի հանդիպումներին։

«Նապոլի» — «Միլան»

«Միլանի»՝ «Նապոլիի» նկատմամբ հաղթանակների յուրատեսակ «հեթ-տրիկը» փչացրեց թիմերի պատասխան խաղի վերջնամասում նեապոլցիների հարձակվող Վիկտոր Օսիմհենի գոլը, որի արդյունքում հանդիպումն ավարտվեց ոչ-ոքի՝ 1։1 հաշվով։ Բանն այն է, որ թիմերը 16 օրվա մեջ 3 հանդիպում անցկացրեցին։ Նախ՝ Ա Սերիայում «Միլանը» հյուրընկալվելիս ջախջախեց «Նապոլիին», հետո՝ ՉԼ-ի առաջին խաղում 1։0 հաշվով տնային հաղթանակ տարավ։ «Միլանը» մոտ էր նաև 3-րդ խաղում հաղթանակին, բայց, ինչպես արդեն նշեցի, ամեն ինչ փչացրեց Օսիմհենը։ Ի դեպ, հատկանշական է, որ «Նապոլիի» գլխավոր ռմբարկուն, որը վնասվածքի պատճառով բաց էր թողել թիմերի առաջին 2 խաղերը, աչքի ընկավ պատասխան խաղում։ Ինչ կարելի է ասել պատասխան հանդիպման մասին։ «Միլանը» շատ վստահ տեսք ուներ։ Չնայած «Նապոլիի»՝ մեկնարկային րոպեներին մեծ ճնշմանը, հյուրերը հանգիստ, առանց լարվելու պաշտպանվում էին։ Պետք է մատնանշել նաև այն, որ 22-րդ րոպեին Ժիրուի չիրացրած 11 մետրանոցը չազդեց իր և թիմակիցների ինքնավստահության վրա։

Առաջին խաղակեսի վերջնամասում Ռաֆայել Լեաուի ֆանտաստիկ անցումը փաստացի վճռեց դիմակայության ելքը։ Պորտուգալացին շրջանցեց մրցակցի մի քանի ֆուտբոլիստների և փոխանցում կատարեց Ժիրուին, որը նպաստավոր դիրքից խոցեց «Նապոլիի» դարպասը։ 82-րդ րոպեին էլ Խվիչա Կվարացխելիայի իրացրած 11 մետրանոցը հետ մղեց Մայք Մենյանը։ Դարպասապահ, որի հետ «Միլանը» լրիվ այլ թիմ է։ Մրցաշրջանի միջնամասում նրա բացակայությունը լրջորեն ազդել էր միլանցիների խաղի վրա։

Եթե ոմանք համաձայն չեն լինի և կպնդեն, որ այս խաղում կար բացահայտ ֆավորիտ և դա «Նապոլին» էր, ապա պետք է ևս մեկ անգամ հիշեցնել․ գավաթային հանդիպումները՝ այն էլ այս փուլերում, լիովին տարբերվում են ներքին առաջնությունների խաղերից։ Զարմանալի չէ, որ «Միլանն» առաջին խաղում 4 գոլ խփեց, իսկ հաջորդ 2 հանդիպումներում ընդամենը մեկական։

Այո, 3 խաղում 2 հաղթանակն ու 1 ոչ-ոքին ապացուցում են, որ մարզչական պայքարում Ստեֆանո Պիոլին հաղթեց Լուչանո Սպալետիին։ Վերջինս կարող է դժգոհել վնասվածքներից, մրցավարական սխալներից, բայց պետք է խոստովանի, որ 270 րոպեների ընթացքում իր թիմը նման չէր այն «Նապոլիին», որը մրցաշրջանի մեկնարկից սկսած գեղեցիկ և որ ամենակարևորն էր՝ արդյունավետ ֆուտբոլ էր խաղում։

«Միլանը» կիսաեզրափակիչում է, և դա արդարացի է։

«Բավարիա» — «Մանչեսթեր Սիթի»

Հետաքրքիր է, թե ինչպես են հիմա իրենց զգում «Բավարիայի» ղեկավարները, տնօրենները, բոլոր այն մարդիկ, որոնք որոշեցին քառորդ եզրափակիչի հանդիպումներից առաջ պաշտոնանկ անել Յուլիան Նագելսմանին։ Օլիվեր Կանն ու Հասան Սալիհամիջիչը «արջի ծառայություն» մատուցեցին «Բավարիային»։

Ի՞նչ է տվել Տուխելը թիմին այս ընթացքում։ Վերադարձրել է թիմին Բունդեսլիգայի առաջին տեղ՝ հաղթելով Դորտմունդի «Բորուսիային», բայց գավաթի խաղարկությունում պարտվել է «Ֆրայբուրգին», իսկ առաջնության նախորդ տուրում էլ ոչ-ոքի խաղացել «Հոֆենհայմի» հետ։ «Սիթիի» հետ հանդիպումների բովանդակությունը, ցուցադրած խաղը, Սանե-Մանե կոնֆլիկտն էլ գումարելով, ստանում ենք պատկեր, որ Տուխելը պարզպես «ֆուտբոլային վթարի» ենթարկվեց։ Ինչևէ, վերադառնանք «Մանչեսթեր Սիթիի» հետ հանդիպումներին։ Առաջին խաղում մյունխենցիները ջախջախիչ պարտություն էին կրել 0։3 հաշվով։ Պատասխան խաղը մեկնարկեց «Բավարիայի» ակտիվ գրոհներով, բայց պասիվ, շատ պասիվ «Սիթին» կարողացավ ռեալ վտանգ ստեղծել առաջին կեսում, երբ Հոլանդը, թեկուզ խաղից դուրս իրավիճակում գտնվելով, սլացավ Դայո Ուպամեկանոյի կողքով՝ ստիպելով ֆրանսիացուն խախտել կանոնները։ Այդ դրվագում «Բավարիան» փրկվեց։ Մի քանի րոպե անց Հոլանդը չիրացրեց 11 մետրանոցը, սակայն 2-րդ կեսի սկզբնամասում պարզապես տապալեց Ուպամեկանոյին։ Այդ դրվագը նման էր Լեո Մեսսիի և մյունխենցիների նախկին պաշտպան Ժերոմ Բոատենգի դրվագին։

Պեպ Գվարդիոլան չի դադարում զարմացնել։ Թիմի կազմը, տակտիկան, պաշտպան-կիսապաշտպանները, քիչ փոխարինումները, հաշվով խաղալը, սառնասրտություն պահպանելը․․․ «Մանչեսթեր Սիթին» ֆանտաստիկ մարզավիճակում է, և հետաքրքիր կլինի տեսնել «Ռեալի» հետ՝ կիսաեզրափակիչում սպասվող հանդիպումները։

«Չելսի» — «Ռեալ»

Այս դիմակայության վերաբերյալ ամեն ինչ ասել, գրել, գուշակել և կանխատեսել էին բոլոր այն մարդիկ, որոնք տեղյակ են, որ գնդակը կլոր է, խոտածածկը կանաչ և Ֆրենկ Լեմպարդի գլխավորած թիմը չի կարող հաղթահարել «Ռեալի» նման թիմի արգելքը։ Այդպես էլ եղավ, «Չելսին» 2 խաղերում էլ պարտվեց միևնույն՝ 0։2 հաշվով։ Լեմպարդի «տակտիկական գոհարների» մասին խոսելն անգամ ավելորդ է։

Կա՛մ Լեմպարդը շատ միամիտ է, կա՛մ շատ մեծամիտ։ Նրա խոսքերը, սպասելիքները որևէ աղերս չունեն այն իրականության հետ, որտեղ հայտնվել է «Չելսին»։ 3 խաղ, 3 պարտություն, ընդամենը 1 խփած գոլ։

«Ռեալի» հետ պատասխան խաղում Կանտեն խաղում էր ենթահարձակվողի դիրքում։ Խաղադաշտում նոմինալ 4 կենտրոնական կիսապաշտպան կար, սակայն Մուդրիկը, Սթերլինգը, Ֆելիքսը մեկնարկային կազմում չէին։ Իսկ ամենազավեշտալին այն էր, որ նշած երեք ֆուտբոլիստները խաղադաշտ դուրս եկան միաժամանակ՝ 67-րդ րոպեին, փոխարինելով պաշտպան Մարկ Կուկուրելյային և կիսապաշտպաններ Կոնոր Գալահերին ու Էնցո Ֆերնանդեսին։

«Ռեալի» մասին նույնպես շատ բան չես ասի։ Աշխարհում դժվար թե գտնվի ևս մեկ թիմ, որ կարողանա այսպիսի սառնասրտությամբ գործել։ Դա գալիս է մարզչից։ Ինչպես ասում են, մարզչի բնավորությունը փոխանցվում է թիմին։ Կառլո Անչելոտին էլ հանգիստ, առանց լարվելու, առանց հեծանիվ հորինելու, կարելի է ասել՝ մի փոքր էլ Լեմպարդին ու իր նախկին թիմին խղճալով, «Ռեալին» դուրս բերեց կիսաեզրափակիչ։ Ռոդրիգոն, որը դուբլի հեղինակ էր դարձել պատասխան խաղում, չի դադարում զարմացնել։ Նա Չեմպիոնների լիգայում 19 անգամ եղել է մեկնարկային կազմում, խփել է 15 գոլ և կատարել 9 գոլային փոխանցում։

«Ինտեր» — «Բենֆիկա»

Գավաթային մրցաշարերում, երբ երկխաղյա դիմակայություն է, առաջին հանդիպման արդյունքը թելադրում է պատասխան խաղի ընթացքը։ «Ինտերն» առաջին խաղում հյուրընկալվելիս հաղթել էր 2։0 հաշվով։ Տրամաբանական էր, որ պատասխան խաղում միլանյան թիմը տրամադրված է լինելու մինչև առաջին գոլը։ Այդպես էլ եղավ։

Չնայած նրան, որ հանդիպումն ավարտվեց 3։3 հաշվով, «Ինտերին» մեղադրելու առիթ չկա։ Փաստացի, վերջին շրջանում Ա Սերիայում սարսափելի ելույթներ ունեցող թիմը Չեմպիոնների լիգայի քառորդ եզրափակիչում կատարեց իր առջև դրված առաջադրանքը։ Կարելի է անվերջ խոսել Սիմոնե Ինձագիի որոշումների, դրանց նպատակահարմարության և տրամաբանության մասին, բայց հաղթողներին, գոնե այս փուլում, չեն դատում։

Հենրիխ Մխիթարյանը դարձավ առաջին հայ ֆուտբոլիստը, որը դուրս եկավ Չեմպիոնների լիգայի կիսաեզրափակիչ։

Հայաստանի հավաքականի նախկին ավագը ՉԼ-ի այս մրցաշրջանում ամենաշատ տարածություն հաղթահարած ֆուտբոլիստների թոփ 5-ում է։ 34-ամյա ֆուտբոլիստի համար, դա տպավորիչ արդյունք է։

Այն, որ Մխիթարյանը այս տարիքում կարողացավ դառնալ «Ինտերի» հիմնական կազմի ֆուտբոլիստ, կիսապաշտպանության գլխավոր գործող անձանցից մեկը, փաստում է, որ ֆուտբոլում աշխատասիրությունը տաղանդից ոչ պակաս կարևոր է։ Քչերն էին հավատում, որ Մխիթարյանը կարող է մրցակցել Չալհանօղլու-Բարելա-Բրոզովիչ եռյակից որևէ մեկի հետ։ Իսկ հիմա նա առաջին ընտրությունն է Ինձագիի համար։

Կիսաեզրափակիչներին ընդառաջ

«Ռեալ» — «Մանչեսթեր Սիթի» և «Միլան» — «Ինտեր»․․․ ֆանտաստիկ դիմակայություններ։ «Սիթին» փորձելու է վրեժ լուծել «Ռեալից» նախորդ մրցաշրջանի կիսաեզրափակիչում կրած պարտության համար։ Իսկ միլանյան դերբին աննկարագրելի թեժ է լինելու ոչ միայն խաղադաշտում, այլ նաև դրա սահմաններից դուրս։

Կիսաեզրափակիչի առաջին հանդիպումները կկայանան մայիսի 9-ին և 10-ին, պատասխան խաղերը նախատեսված են մայիսի 16-ին և 17-ին։

Միհրան Ալեքսանյան