«Լոկոմոտիվի» պաշտպան Նաիր Տիկնիզյանի առաջին մարզիչ Ալեքսանդր Չելպանովը գնահատել է ֆուտբոլիստի նորամուտը Հայաստանի հավաքականի կազմում՝ Թուրքիայի դեմ խաղում։
«Իմ կարծիքով՝ նորամուտի համար Նաիրը որակյալ հանդիպում անցկացրեց: Նա հսկայական աշխատանք կատարեց, այդ թվում՝ սկսելով գոլային գրոհը: Նաև կարելի է նշել նրա հուսալի խաղը պաշտպանական գործողություններում։ Միգուցե հարձակման ժամանակ սրության մի փոքր պակաս կար, բայց, ամենայն հավանականությամբ, դա պայմանավորված էր հուզմունքով և մեծ պատասխանատվությամբ: Այդուհանդերձ, նրա կարիերայի առաջին հանդիպումը միջազգային ասպարեզում բարձր մակարդակով էր։
Խաղից հետո զրուցեցի Նաիրի հետ։ Մենք անընդհատ կապի մեջ ենք, զանգում ենք իրար, հաղորդագրություններ ուղարկում, քննարկում ենք տարբեր պահեր, և Թուրքիայի դեմ խաղը բացառություն չէր։ Նաիրը ուրախ էր, որ նորամուտը Հայաստանի հավաքականի կազմում այդքան մեծ թվով երկրպագուների ներկայությամբ էր: Բնականաբար, նա վրդովված է պարտությունից։ Կարծում եմ՝ արժանի չէին պարտության, քանի որ Հայաստանի հավաքականը ոչնչով չէր զիջում Թուրքիայի հավաքականին, նույնիսկ ցանկությամբ ու նվիրումով գերազանցեց նրան։
Ադապտացվելու հարցում նրան շատ են օգնել Էդիկ Սպերցյանն ու Խորեն Բայրամյանը, Գեորգի Հարությունյանին լավ ծանոթ չէ, բայց նրանց ճանապարհները խաչվել են։ Տղաներն իսկապես շատ են օգնել նրան։ Ընդհանուր առմամբ թիմը նրան շատ լավ է ընդունել։ Տիկնիզյանը նշեց, որ թիմում բոլորը շատ մոտիվացված են. լավ թիմ է հավաքվում։ Կարծում եմ՝ ապագայում նրանք հետաքրքիր թիմ կլինեն։
Ես իսկապես հույս ունեմ, որ ապագայում Նաիրը կայուն խաղացող կդառնա ազգային հավաքականում։ Առաջին խաղը ցույց տվեց, որ նա իսկապես կարող է որակ ավելացնել ազգային թիմին։ Նրա նվիրումն ու ցանկությունը իրենց դերը կխաղան։ Նա միայն կավելացնի։ Ըստ այդմ՝ Հայաստանի հավաքականը նույնպես։ Նաիրի համար ազգային հավաքականը նոր մարտահրավեր է, վերագործարկում: Դրանից նա միայն կուժեղանա, և դա դրական դեր կխաղա ՌՊԼ-ի խաղերում»,- ասել է Չելպանովը Sport24-ի հետ զրույցում։
