Մարտի 28-ին՝ ժամը 19:00-ին, Հայաստանի ազգային հավաքականը Վազգեն Սարգսյանի անվան «Հանրապետական» մարզադաշտում ընկերական հանդիպում կանցկացնի Կիպրոսի ընտրանու հետ։
Հայաստանի ազգային հավաքականի գլխավոր մարզիչ Ալեքսանդր Պետրակովն այսօր կայացած նախախաղային մամուլի ասուլիսի ժամանակ իր կարծիքն է հայտնել Կիպրոսի հավաքականի հետ առաջիկա ընկերական հանդիպման մասին։
«Հիմնականում երեկ վերականգնողական մարզում ենք անցկացրել։ Որքանով են հասցրել վերականգնվել՝ կիմանանք այսօրվա մարզման ժամանակ։
Կիպրոսի հավաքականի վերաբերյալ կասեմ, որ բավականին ամուր, եվրոպական միջին մակարդակի թիմ է։ Նրանք Շոտլանդիայի հետ խաղում լավ տեսք ունեին, հաշիվը չէր արտացոլում խաղադաշտում նրանց ցուցադրած խաղը։
Թուրքիայի հավաքականի ֆուտբոլիստները խաղում են եվրոպական թոփ առաջնություններում, որոշ դիրքերում կա խաղամակարդակի տարբերություն։ Մեր տղաները նվիրվածության հաշվին կարողացան չեզոքացնել այդ տարբերությունը։ Ոսկանյանի դրվագը հետո նայեցի։ Զարմացա, որ այդ դրվագում 11 մետրանոց չնաշանակվեց։ Կարծում եմ, որ մրցակցի դեպքում լիներ նման դրվագ, նրանց ամբողջ պահեստայինների նստարանը կվազեր դեպի մրցավարը։
Որպեսզի թիմը խաղա կարճ և միջին փոխանցումներով, անհրաժեշտ են համապատասխան կարգի խաղացողներ։ Այդ ամենի համար ժամանակ է պետք, ժամանակ է պետք այդպիսի խաղ ներդնելու համար։
Վաղը կլինեն որոշակի փոփոխություններ հիմանական կազմում։ Ընդհանուր առմամբ գոհ եմ խաղային կարգապահությունից։ Վաղվա խաղի հետ կապված, համեմատած Թուրքիայի հետ խաղը, Կիպրոսի հետ հանդիպումը կունենա այլ բնույթ»,- ասել է Հայաստանի հավաքականի գլխավոր մարզիչը։
