Հայաստանի հավաքականի նորեկ, «Լոկոմոտիվի» պաշտպան Նաիր Տիկնիզյանը Metaratings-ին տված հարցազրույցում ասել է, որ Ռուսաստանի հավաքականի հեռացումը միջազգային մրցաշարերից ազդել է սպորտային քաղաքացիությունը փոխելու իր որոշման վրա։
«Դա միանշանակ ազդեց իմ ընտրության վրա։ Միշտ փորձում եմ ճշմարտությունն ասել, այստեղ էլ ուզում եմ անկեղծ լինել։ Թե որքանով է սա ազդում մյուս տղաների վրա, դժվարանում եմ պատասխանել։ Բայց ես չէի կարող չօգտվել հնարավորությունից և չխաղալ միջազգային մակարդակի բարձրակարգ թիմերի դեմ:
Ես ունեմ այդ հնարավորությունը, փառք Աստծո, դա կա։ Հայաստանն ինձ տվել է այդ հնարավորությունը, ես շնորհակալ եմ դրա համար։ Ես իսկապես հույս ունեմ, որ միասին մենք կարող ենք հասնել մեծ արդյունքների։ Ամեն ինչ անելու եմ, որ հայ ժողովուրդը մի օր տոնի ազգային հավաքականի մասնակցությունը Եվրոպայի կամ Աշխարհի առաջնությունում»,- ասել է Տիկնիզյանը։
Մարտի 7-ին հայտնի դարձավ, որ Տիկնիզյանը հրավիրվել է Հայաստանի հավաքական։ Մարտի 20-ին ՀՖՖ-ն հաստատել է, որ Տիկնիզյանը հայկական անձնագիր է ստացել և կկարողանա մասնակցել Թուրքիայի դեմ կայանալիք խաղին: Եվրո-2024-ի որակավորման փուլի Հայաստան-Թուրքիա հանդիպումը կկայանա շաբաթ՝ մարտի 25-ին:
Տիկնիզյանը «Լոկոմոտիվ» է տեղափոխվել 2021 թվականին ԲԿՄԱ-ից։ Այս մրցաշրջանում 23-ամյա պաշտպանը մոսկովյան թիմի կազմում 28 հանդիպում է անցկացրել տարբեր մրցաշարերում: Տիկնիզյանը հանդես է եկել Ռուսաստանի երիտասարդական հավաքականում, որի կազմում մասնակցել է 7 հանդիպման։
