Թուրքիայի հավաքականի գլխավոր մարզիչ Շտեֆան Կունցը խոսել է Եվրո-2024-ի ընտրական փուլի Հայաստանի և Խորվաթիայի հետ առաջիկա խաղերի մասին։
«Ազգերի լիգայի վերջին խաղերից գոհ չեմ, իսկ վերջին ընկերական խաղերում (նոյեմբերին հաղթել են Շոտլանդիայի ու Չեխիայի հավաքականներին, խմբ․) շատ բան փորձեցինք, և ես շատ գոհ էի։
Միակ բանը, ինչի համար ուրախ կլինեմ, որ մենք մասնակցենք Եվրոյին։ Որպես գերմանացի մարզիչ՝ ես շատ կցանկանայի մասնակցել Գերմանիայում կայանալիք առաջնությանը»,- ասել է մարզիչը մամուլի ասուլիսի ժամանակ։
Թուրքիայի հավաքականի գլխավոր մարզչի խոսքերով՝ Հայաստանն ու Խորվաթիան տարբեր խաղամակարդակի թիմեր են, և իրենք պատրաստվում են դրան համահունչ։
«Վերջերս անհատական զրույցներ եմ ունեցել հավաքականի շատ խաղացողների հետ: Մենք շոշափել ենք բազմաթիվ թեմաներ։ Կան շատ բաներ, որոնք ես ուսումնասիրել եմ վերջին շրջանում՝ միջազգային հարցերը Հայաստանի հետ, թե ինչպես է երկրաշարժը ազդել մեր խաղացողների վրա։ Նաև Ռամադանն է սկսվելու մեր հավաքի ու հանդիպումների ընթացքում: Ես տեղեկություններ էի հավաքում այս հարցերի վերաբերյալ և փորձում էի հնարավորինս լավ պատրաստել թիմին առաջիկա հանդիպումներին։
Որքան ուժեղ լինենք, այնքան ավելի շատ առավելություններ կունենանք մեր մրցակիցների նկատմամբ»,- ասել է մարզիչը մամուլի ասուլիսի ժամանակ։
Հիշեցնենք, որ Հայաստանի հավաքականը Եվրո-2024-ի ընտրական փուլը կմեկնարկի Թուրքիայի ընտրանու հետ խաղով․ հանդիպումը կկայանա մարտի 25-ին, Երևանում։ Մարտի 28-ին մեր հավաքականը ևս մեկ հանդիպում կանցկացնի, բայց այս անգամ՝ ընկերական։ Մեր ընտրանին սեփական հարկի տակ կընդունի Կիպրոսի հավաքականին։
