«Չելսին» շարունակում է բանակցությունները «Դինամոյի» կիսապաշտպան Արսեն Զախարյանի տրանսֆերի շուրջ։
Լրագրող Ֆաբրիցիո Ռոմանոյի խոսքերով՝ լոնդոնյան ակումբը բանակցություններ է վարում ինչպես 19-ամյա կիսապաշտպանի, այնպես էլ մոսկովյան ակումբի հետ։ «Չելսին» ներկայումս կիսապաշտպանի տրանսֆերը ձեռք բերելու հարցում ֆավորիտ է:
Ապագայում «Չելսին» ցանկանում է թիմ կառուցել երիտասարդ տաղանդների շուրջ: Նշվում է, որ Զախարյանը տեղավորվում է այս ռազմավարության մեջ։
Sports.ru-ն, հղում անելով Զախարյանին մոտ կանգնած աղբյուրին, գրում է, որ Արսենը դեկտեմբերին ժամանելու է Երևան՝ Հայաստանի քաղաքացու անձնագիր ստանալու համար։ Սա կհեշտացնի Մեծ Բրիտանիայում աշխատանքային թույլտվություն ստանալը: Նշվում է, որ սպորտային քաղաքացիության փոփոխության մասին խոսք չկա։ Զախարյանը կմնա Ռուսաստանի հավաքականի խաղացող։
«Չելսին» ակնկալում է, որ Ռուսաստանը դեռ մի քանի տարի չի խաղա միջազգային մրցաշարերում, և այս իրավիճակը համարվում է որպես դրական, քանի որ կիսապաշտպանը մնալու է թիմի տրամադրության տակ միջազգային խաղերի ընդմիջումներին։
Լուծվել է նաև «Չելսիից» «Դինամոյին» գումար փոխանցելու հարցը՝ դա արվելու է հայկական բանկի միջոցով։
