Նոյեմբերի 9-ին կայացել է ՀՖՖ կարգապահական և էթիկայի կոմիտեի հերթական նիստը, որի ընթացքում 2 հարց է քննարկվել: Դրանցից մեկը վերաբերել է հոկտեմբերի 29-ին կայացած «Լեռնային Արցախ» — «Ուրարտու» խաղի ժամանակահատվածում ենթադրյալ կարգապահական խախտումներին:
Հիշեցնենք՝ այդ խաղում «Ուրարտուն» Վայքում 2-1 հաշվով հաղթանակ է տարել, իսկ 85-րդ րոպեից խաղացել է 10 հոգով՝ Կարեն Մելքոնյանի հեռացումից հետո: «Լեռնային Արցախի» կազմում ևս հեռացում է եղել, բայց մարզչական շտաբի կազմում: Հեռացվել է թիմի գլխավոր մարզիչ Արտաշես Ադամյանի օգնական Արմո Ադամյանը:
Նիստի արդյունքում կոմիտեն որոշել է՝
1. Հաստատված համարել «Լեռնային Արցախ» թիմի պաշտոնյա Արմո Ադամյանի կողմից կարգապահական խախտումներ թույլ տալը և հիմք ընդունելով Կանոնակարգի 28.03, 40-րդ հոդվածի 37-րդ կետերը` «Լեռնային Արցախ» թիմի պաշտոնյա Արմո Ադամյանին որակազրկել մինչև 2023 թվականի մայիսի 31-ը ներառյալ, իսկ ակումբին տուգանել նվազագույն աշխատավարձի հինգհարյուրապատիկի՝ 500․000 ՀՀ դրամի չափով։
2. Հաստատված համարել «Լեռնային Արցախ» թիմի կողմից կարգապահական խախտում թույլ տալը և հիմք ընդունելով Կանոնակարգի 40-րդ հոդվածի 24-րդ կետը՝ «Լեռնային Արցախ ՖԱ» ՍՊԸ-ին տուգանել նվազագույն աշխատավարձի հիսունապատիկի՝ 50․000 ՀՀ դրամի չափով:
3. Հաստատված համարել «Լեռնային Արցախ» թիմի կողմից կարգապահական խախտում թույլ տալը և հիմք ընդունելով Կանոնակարգի 40-րդ հոդվածի 39-րդ կետը՝ «Լեռնային Արցախ ՖԱ» ՍՊԸ-ին տուգանել նվազագույն աշխատավարձի հարյուրապատիկի՝ 100․000 ՀՀ դրամի չափով:
«Ուրարտուն» ևս տուգանվել է, իսկ Կարեն Մելքոնյանը՝ որակազրկվել երկու խաղով: Երևանյան թիմն, ընդհանուր առմամբ, 300 հազար դրամի տուգանք կվճարի:
Նիստի ամբողջական արձանագրությունը կարող եք տեսնել այստեղ։
