Fastex Հայաստանի Պրեմիեր լիգայի առաջին խաղաշրջանից հետո Չարենցավանի «Վանը»13 միավորով 5-րդ տեղում է:
Արթուր Ասոյանի գլխավորած թիմը անցկացրած 9 խաղում տարավ 3 հաղթանակ, 4 խաղ ավարտեց ոչ-ոքի արդյունքով, իսկ 2-ում՝ պարտություն կրեց: Վաղը «Վանը» կսկսի պայքարը Fastex Հայաստանի գավաթի խաղարկությունում՝ 1/8 եզրափակիչում մրցելով «Լեռնային Արցախի» հետ:
Ակումբի մամուլի ծառայության հետ զրույցում «Վանի» գլխավոր տնօրեն Սևադա Արզումանյանն ամփոփել է առաջնության առաջին խաղաշրջանը, խոսել գավաթի խաղարկությունում սպասելիքների մասին.
«Առաջին հայացքից թիմը լավ տպավորություն թողեց: Մարտունակ կազմ ունենք ու տպավորիչ խաղեր ենք անցկացրել: Որոշակի գոհունակություն կարող եմ հայտնել, սակայն բավականին միավորներ կորցրինք այնպիսի խաղերում, որտեղ կարող էր լրիվ հակառակը լիներ: Այդ միավորների կորուստը հետագայում կարող է մեզ ափսոսանքի շատ մեծ զգացում պատճառել: Առաջին շրջանում հավասար մրցակցություն էր բոլոր թիմեր միջև, բայց հաշվի առնելով մեր խաղերի ընթացքը, տղաների տրամադրվածությունը, մարզչական շտաբի աշխատանքը՝ կարծում եմ, որ մենք կարող էինք ավելի շատ միավորներ վաստակել: Կարծում եմ կկարողանանք նույն ոգևորությունն ու կազմակերպվածությունը պահպանել ու շարունակել միավորներ հավաքել, քանի որ ակումբի ղեկավարությունն անում է հնարավորինը, որպեսզի թիմը խաղա բարձր մակարդակով»,-ասել է Սևադա Արզումանյանը:
Խոսելով գավաթի խաղարկությունում սպասելիքների մասին, ակումբի գլխավոր տնօրենն ասել է.
«Գաղտնիք չէ, որ գավաթի խաղարկությունը եվրագավաթներ տանող ամենակարճ ճանապարհն է: Գրեթե բոլոր թիմերի համար նպատակը մեկն է՝ նվաճել գավաթը ու ձեռք բերել եվրագավաթային ուղեգիր: Հուսով եմ, որ ակումբի մարզիչներն ու ֆուտբոլիստները դա լավ հասկանում են ու կանեն ամեն ինչ, որպեսզի գավաթի մեկնարկը մեզ մոտ հաղթական լինի: Հիմա մենք կենտրոնացած ենք միայն առաջիկա խաղի վրա: Իհարկե մեր առջև խնդիր է դրված նաև գավաթի խաղարկության միջոցով ձեռք բերել եվրագավաթային ուղեգիր»:
