«Արարատի» գլխավոր մարզիչ Արամ Ոսկանյանը Fastex Հայաստանի Պրեմիեր լիգայի 9-րդ տուրի «Ուրարտուի» դեմ խաղից հետո կիսվել է իր տպավորություններով:
— Հիասթափված եմ, որ խաղավերջում գոլ բաց թողեցինք: Ամբողջ խաղի ընթացքում վատ չէինք խաղում: Ընտրել էինք հակագրոհների մարտավարոթյունը և բավական տարածություններ կային: Նորից չհերիքեց կատարողական վարպետությունը, որպեսզի պահերը գոլի վերածենք:
— Երրորդ անընդմեջ պարտությունը կրեցիք և առաջնությունում ընդամենը չորս գոլ եք խփել: Կարելի է՞ ասել, որ թիմում ճգնաժամ կա:
— Ես ինքս տեսնում եմ, որ ճգնաժամը առջևի գծի եզրափակումներում է: Մենք նախորդ ութ խաղերը խաղացել ենք բարձր պրեսինգով, շատ գոլային պահեր ենք ստեղծել, սակայն նորից չէինք կարողանում իրացնել: Այդ պատճառով ընտրեցինք այս մարտավարությունը և տեսնում ենք, որ սա նույնպես բարդ է: Ճգնաժամ չէի ասի: Ավելի շատ կա հոգեբանական խնդիր:
— Միշտ նշում եք, որ գրոհների եզրափակման հետ խնդիր կա: Դա է՞ր պատճառը, որ նախաձեռնությունը զիջել էիք «Ուրարատուին»։
— Այո, հաշվի էինք առել այն, որ «Ուրարատուն» սիրում է խաղալ գնդակով: Չենք սխալվել, քանի որ շատ խոստումնալից հակագրոհներ ունեցանք: Բայց եզրափակման փուլում որոշումները սխալ էինք կայացնում:
— Այսօր Արտյոմ Պոտապովը երկու գոլ բաց թողեց, բայց հիանալի հանդիպում անցկացրեց: Ի՞նչ կասեք նրա մասին:
— Այո, առաջին կեսում էլ երկու-երեք դրվագում փրկեց, երկրորդ կեսում էլ լավ ֆուտբոլ խաղաց: Գոլի դրվագում «Ուրարտուի» հարձակվողը որակյալ հարված կատարեց: Ընդհանուր առմամբ, նա լավ խաղ է անցկացրել:
— Ի՞նչ կասեք Հրայր Մկոյանի մասին:
— Հրայրը ցավերով էր վերադարձել հավաքականից: Նա ոտքին հարված էր ստացել: Նրա մասնակցությունը հարցականի տակ էր, սակայն իմանալով իր բնավորությունը, որոշեցինք նրան ընդգրկել մեկնարկային կազմում: Վերջում միգուցե պետք չէր իրեն փոխարինել: Ուղղակի նա նույն հարվածը ստացավ և մտածեցի կվնասենք իրեն, եթե թողնենք դաշտում: Իմ կարծիքով, իրեն փոխարինելը սխալ էր: