Իռլանդիայի հավաքականի գլխավոր մարզիչ Ստիվեն Քենին Ազգերի լիգայի խմբային փուլի վերջին տուրի` Հայաստանի հետ հանդիպման նախախաղային մամուլի ասուլիսում խոսել է սպասվող խաղի մասին։
«Շատ կարևոր խաղ է, մենք անհամբերությամբ ենք սպասում դրան։ Մեզ համար կարևոր խաղ է, և մենք ցանկանում ենք հաղթել: Մենք վճռական ենք տրամադրված։
Բոլորը լիովին պատրաստ են: Ջոշ Քալենը որակազրկված է, ուստի նա միակ խաղացողն է, որը բացակայում է:
Մենք դիտարկում ենք, որ կունենանք մեկ-երկու փոփոխություն, բայց ոչ արմատական: Կարծում եմ՝ շաբաթ օրը թիմը լավ խաղաց»,- ասել է Քենին:
Իռլանդացիների մարզիչն անդրադարձել է այն հարցին, որ թիմը կարող է նահանջել C լիգա, եթե Դուբլինում պարտվի Հայաստանի հավաքականին։ Մարզիչն ընդգծել է, որ կենտրոնացած չէ նման սցենարի վրա:
«Դա այն չէ, ինչի վրա մենք կենտրոնանում ենք։ Մեր ուզած բաներից մեկը վաղը երեկոյան հաղթելն է, և մենք ցանկանում ենք լավ խաղալ:
Շոտլանդիայի դեմ մեր վերջին տնային խաղում տեսանք վառ խաղ և հաղթանակ 3:0 հաշվով: Մենք երկար տարիներ նման համոզիչ կերպով տանը չէինք հաղթել բարձրակարգ թիմի։
Դա կարևոր էր, և մենք դա հաստատեցինք Ուկրաինայի դեմ իրոք լավ խաղով և ոչ-ոքի գրանցեցինք, իսկ շաբաթ օրը բավականին լավ հանդիպում անցկացրեցինք, չնայած հիասթափված էինք պարտության պատճառով։
Մենք ցանկանում ենք հաստատել մեր հավակնությունները վաղը երեկոյան ուժեղ ելույթով։
Ես չեմ կարծում, որ առանց վախի խաղալը խնդիր է։ Իհարկե, մենք հիասթափված ենք, թե ինչպես խաղացինք Հայաստանում։
Անհամբեր սպասում ենք վաղվա խաղին։ Մենք պետք է հաղթանակ տանենք: Հայաստանը արժանիորեն է հայտնվել B դիվիզիոնում: Նրանք հաղթել են իրենց խումբը, որպեսզի հասնեն այստեղ, ուստի մենք պետք է լավ խաղ ցուցադրենք հաղթանակի հասնելու համար։
Մրցակցի երկու խաղացողները՝ Վարազդատ Հարոյանը և Էդուարդ Սպերցյանը վերադարձել են կազմ։ Նրանք որակազրկման պատճառով բաց էին թողել նախորդ խաղը։ Նրանք լավ հակագրոհող թիմ են, ուստի մենք ցանկանում ենք ուժեղ ելույթ ունենալ մեզ անհրաժեշտ հաղթանակի համար»,- ասել է Քենին նախախաղային ասուլիսի ժամանակ։
Ազգերի լիգայի խմբային փուլի վերջին տուրում Հայաստանի հավաքականը սեպտեմբերի 27-ին կհյուրընկալվի Իռլանդիայի ընտրանուն։ Հանդիպումը կմեկնարկի Երևանի ժամանակով 22։45-ին։
Հայաստանի հավաքականը 3 միավորով 4-րդ տեղում է, իսկ Իռլանդիան՝ 4 միավորով 3-րդն է։ Խմբում վերջին տեղ զբաղեցրած թիմը կնահանջի C դիվիզիոն։
