Vbet Հայաստանի Պրեմիեր լիգայի նախավերջին տուրում «Փյունիկը» «Հանրապետական» մարզադաշտում առավելության հասավ «Արարատի» նկատմամբ ու առաջնության ավարտից մեկ տուր առաջ նվաճեց չեմպիոնությունը։
Խաղից հետո նորընծա չեմպիոն թիմի գլխավոր մարզիչ Եղիշե Մելիքյանն ասաց հետևյալը.
«Ինչպես միշտ «Արարատը» խնդիրներ ստեղծեց: Չեմպիոն դառնալու ճանապարհը շատ դժվար էր: Մի պահ 8-9 միավոր հետ էինք «Արարատ-Արմենիայից», բայց կարողացանք առաջնության երկրորդ մասում հասնել նրանց միավորներով: Ուզում եմ շնորհակալություն հայտնել մեր նախագահին, քանի որ մենք այս դժվարին օրերին մի օր չենք զգացել ոչ մի խնդիր: Մեր երկրպագուներից եմ շատ շնորհակալ, մարզչական շտաբից լավ աշխատանքի համար, ակադեմիայի երեխաներից, որոնք միշտ մեզ հետ են եղել, ու ամենակարևորը՝ մեր ֆուտբոլիստներին, որոնք նվիրված աշխատեցին ու գոհ եմ նաև բոլոր նրանցից, ովքեր այսօր խաղադաշտ դուրս չեկան»,-ասաց Մելիքյանը:
Խոսելով Գևորգ Ղազարյանի բացակայության մասին մարզիչն ասաց.
«Ես մտադիր էի նրան դուրս բերել խաղադաշտ, բայց վնասվածքից հետո պատրաստ չէր: Ես կուզեի, որ նա որպես ավագ խաղադաշտ դուրս գար: Մեկ անգամ չէ, որ ասել եմ, եթե նրա վիճակը լավ լիներ, անպայման խաղադաշտ դուրս կգար»,-ասաց Մելիքյանը:
