«Չելսիի» և ԱՄՆ-ի հավաքականի հարձակվող Քրիստիան Պուլիշիչը հույս ունի, որ կարող է դուրս գալ ազգային հավաքականի հետ միասին 2022 թվականին Քաթարում կայանալիք աշխարհի առաջնության եզրափակիչ փուլ։
«Ակնհայտ է, որ նախորդ անգամ ևս մենք կարող էինք մասնակցել Աշխարհի առաջնությանը, բայց չհասանք մեր նպատակին։ Մեր թիմը քաղցած է, մենք ուզում ենք ամեն ինչ անել, որպեսզի այս անգամ դուրս գանք Աշխարհի առաջնություն։
Մենք չենք ցանկանում նորից անհաջողությունների միջով անցնել, այնուամենայնիվ, անձամբ ես ոչնչի համար չեմ ափսոսում։ Անցյալի պատմությունը ինձ և թիմի մնացած անդամներին շատ բան է սովորեցրել, բայց հիմա մենք ավելի ինքնավստահ ենք դարձել և խաղերին պատրաստվում ենք այն համոզմամբ, որ կարող ենք հաղթել»,- Պուլիշիչի խոսքերն է մեջբերում Goal-ը։
ԱՄՆ-ի հավաքականը 2022 թվականի Հյուսիսային Ամերիկայի ընտրական մրցաշարի աղյուսակում երկրորդն է՝ 11 խաղից հետո 21 միավորով։ Մրցաշարի ուղեգիր ապահովելու համար ամերիկացիներին անհրաժեշտ է հայտնվել լավագույն եռյակում:
Ընտրական խմբային փուլում ԱՄՆ-ի հավաքականին մնացել է երեք հանդիպում՝ Մեքսիկայի (մարտի 25), Պանամայի (մարտի 28) և Կոստա Ռիկայի (մարտի 31) դեմ։ ԱՄՆ հավաքականի և չորրորդ տեղում ընթացող Պանամայի միջև տարբերությունը 4 միավոր է։
