Արարատ-Արմենիայում կան խաղացողներ, ովքեր կարող են մրցակցել ՌՊԼ-ի ֆուտբոլիստների դեմ․ Գունկո

«Արարատ-Արմենիայի» գլխավոր մարզիչ Դմիտրի Գունկոն ծավալուն հարցազրույց է տվել Матч ТВ-ին, որի ընթացքում անդրադարձել է նաև Հայաստանի առաջնությանն ու երևանյան թիմին։

-Ձեր թիմում լեգեոներներն ավելի՞ շատ են, քան տեղացի խաղացողները։

-Չէի ասի, թե հայ ֆուտբոլիստներ քիչ ունենք։ Առաջնության կանոնադրության համաձայն 9 տեղացի խաղացող պետք է հայտացուցակում լինի, և 3 խաղացող խաղադաշտում։ Մրցաշրջանի առաջին հատվածում մեր կազմում 4 խաղացող էր հանդես գալիս դաշտում։ Այնպես որ տեղացի խաղացողներ ունենք։ Թիմում կա մրցակցություն և այն օգնում է վարպետության բարձրացմանը։

-Նրանք կկարողանայի՞ն խաղալ Ռուսաստանի Պրեմիեր-լիգայում։

-Բարդ հարց է։ Մենք խաղացինք «Ուրալի» դեմ, և ինձ այդ խաղը շատ հետաքրքիր ու ինֆորմատիվ ստացվեց, տեսա, թե մեր ֆուտբոլիստներն ինչպես են մրցակցում ՌՊԼ-ի խաղացողների հետ։ Թեև թիմերը հիմա ֆունկցիոնալ տարբեր վիճակներում են գտնվում, քանի որ առաջին պաշտոնական խաղը մենք կանցկացնենք փետրվարի 19-ին, իսկ «Ուրալը» փետրվարի 26-ին, բայց մեր կազմում կան խաղացողներ, ովքեր կարող են մրցակցել ՌՊԼ-ի ֆուտբոլիստների հետ։

-Ձեր մարզչական շտաբում սպարտակցիներ են ընդգրկվել։ Ձե՞ր որոշումն է։

-Իմ։ Շնորհակալություն ակումբի ղեկավարությանը, գործադիր տնօրեն Պողոս Գալստյանին, նրանք թույլ տվեցին իմ մարզչական շտաբը հավաքել։ Բայց ինձ միայն «Սպարտակի» դպրոցն անցած մարդիկ չէ, որ օգնում են։ Բացի Դմիտրի Կուդրյաշովից, Նիկոլայ Տյունինից, կան նաև Ալեքսեյ Գորշկովն ու Անատոլի Ռոժկովը։

-Պրոպագանդո՞ւմ եք սպարտակյան խաղային ոճը։

-Գեղեցիկ ֆուտբոլի համար միավորներ չեն տալիս։ Կարևոր է, որ այն ֆուտբոլը, որը ցույց ենք տալիս, նաև արդյունք բերի։ Կան բաներ, որոնք իրենց արդյունքը տալիս են ինչպես ՌՊԼ-ում, այնպես էլ Հայաստանի առաջնությունում։ Եվ մենք պետք է ընտրենք այն, ինչը պտուղներ կտա մեր ձեռքի տակ եղած կազմի հետ։

Բնականաբար, կա մեր սեփական ոճը, բայց այն կախված է կատարողներից։ Եթե արագ ֆուտբոլիստի հետ գործ ունենք, ապա կխաղանք մեջքից, եթե ֆուտբոլիստը լավ գնդակ է պահում, ապա նրան կփնտրենք գրոհների ժամանակ ու գնդակ կտանք նրան։ Մենք օգտագործում ենք յուրաքանչյուրի լավագույն որակները։

-Հայաստանի առաջնության մակարդակը հավասար է Ֆուտբոլի Ազգային լիգայի՞ն, թե՞ ՌՊԼ-ի երկրորդ հատվածին։

-Կարճ ժամանակում ցանկացած թիմ էլ կարող է մեկ խաղ անցկացնել, բայց երկար ժամանակ մրցակցելն արդեն բարդ է։ Այնպես որ Հայաստանի առաջնության մրցաշարային աղյուսակի վերին հատվածում գտնվող թիմերը կարող են պայքարել ՌՊԼ դուրս գալու համար։ Պայմանականորեն, այն «Օրենբուրգն» է, բայց մի քանի անգամ փոքր բյուջեով։

-Հայաստանում գործո՞ւմ է VAR համակարգը։

-Ոչ։ Համակարգը լավն է, բայց ոչ այն դեպքում, երբ Ռուսաստանում դրանք դիտելու համար մի քանի րոպեով խաղը կանգնում է, դա պարզապես սպանում է VAR-ը։ Եվրոպայում արդեն այլ ալգորիթմ է գործում, որը թույլ է տալիս ավելի արագ որոշումներ կայացնել։