Մելբուրնում շարունակվում է թենիսի Ավստրալիայի բաց առաջնությունը։ Այսօր հայտնի են դարձել կիսաեզրափակչի բոլոր մասնակիցների անունները։
Տղամարդկանց մենախաղում քառորդ եզրափակչի վերջին խաղում միմյանց դեմ մրցում էին աշխարհի առաջին ռակետ Ռաֆայել Նադալն ու հինգերորդ ռակետ Դոմինիկ Տիմը։ Վերջինս 4 ժամ 10 րոպե տևած պայքարում չորս սեթում հաղթեց Նադալին 7-6(3), 7-6(4), 4-6, 7-6(6) հաշվով ու կարիերայի ընթացքում առաջին անգամ դուրս եկավ Ավստրալիայի բաց առաջնության կիսաեզրափակիչ։
Եզրափակչի ուղեգրի համար պայքարում Դոմինիկ Տիմը ուժերն է չափելու Ալեքսանդր Զվերևի հետ, ով ավելի վաղ չորս սեթում հաղթել էր Ստեն Վավրինկային։ Գերմանացի թենիսիստի համար սա ընդհանրապես առաջին կիսաեզրափակիչն է Grand Slam-երում։
Կիսաեզրափակչի մյուս զույգը կազմել են Ռոջեր Ֆեդերերն ու Նովակ Ջոկովիչը։
