ՀՀ ձյուդոյի հավաքականի գլխավոր մարզիչ, մոտ անցյալի նշանավոր վարպետ, գյումրեցի Հովհաննես Դավթյանը ՀԱՕԿ-ի հետ զրույցում հայտնել է, որ թիմի առաջատար, 73 կգ քաշային Ֆերդինանդ Կարապետյանը չի մասնակցի փետրվարի սկզբին Փարիզում կայանալիք վարկանիշային մրցաշարին:
Հիշեցնենք` Իսրայելի մայրաղաղաք Թել Ավիվում օրերս ավարտված ձյուդոյի «Գրան պրի» օլիմպիական վարկանիշային մրցաշարում Հայաստանի ներկայացուցիչը մաքուր հաղթանակներ էր տարել մրցակիցների նկատմամբ ու մտել եզրափակիչ, որին սակայն չէր կարողացել մասնակցել վնասվածքի պատճառով ու բավարարվել էր արծաթե մեդալով.
«Ափսոսում եմ , որ Փարիզում փետրվարի 7- 8-ին անցկացվող վարկանիշային մրցաշարին Ֆերդինանդը չի կարողանա մասնակցել: Հարց է, թե երբ կապաքինվի նրա ձեռքի վնասվածքը: Գոնե կարողանա հանդես գալ Դյուսելդորֆում փետրվարի 21-ին տեղի ունենալիք ստուգատեսին: Կարևոր է, որ Ֆերդինանդը լիովին առողջանա ու դրանից հետո մտնի տատամի, որ չկրկնվի վնասվածքը»,- ասել է Հովհաննես Դավթյանը:
Գլխավոր մարզիչն անդրադարձել է նաև հերթափոխին.
«Հուսալի տղաներ կան, որոնք վերջերս համալրել են ազգային հավաքականը: Մրցափորձի պակասի պատճառով նրանք առայժմ չեն գործուղվում օլիմպիական նշանակության մրցաշարերի: Փոխարենը երիտասարդները իրենց ուժերը կփորձեն ապրիլ-մայիս ամիսներին կայանալիք Եվրոպայի գավաթի խաղարկության փուլերին»,- եզրափակել է իր խոսքը Հովհաննես Դավթյանը:
