«Շատ կարևոր է, որ պահպանեք լավատեսությունը, դրականը մտածեք և երբեք չդադարեք անել այն, ինչ սիրում եք»․ այս խոսքերով Հայաստանի ազգային հավաքականի գլխավոր մարզիչ Խոակին Կապառոսը դիմեց Յոլյանի անվան Արյունաբանական կենտրոնում բուժում ստացող երեխաներին, որոնց հետ հանդիպեց այսօր՝ նոյեմբերի 1-ին, «Ժպիտների քաղաք» բարեգործական հիմնադրամի նախաձեռնությամբ։
66-ամյա իսպանացի մասնագետը, որը լեյկեմիա ունի, երեխաներին պատմեց իր հիվանդության մասին, հորդորեց ոչ մի դեպքում չկորցնել հավատն ու լավատեսությունը․
«Գիտեք, որ ինձ մոտ էլ է տարիներ առաջ ախտորոշվել այդ հիվանդությունը, բայց ես այստեղ եմ կյանքով լի: Հիվանդության մասին իմացա «Սևիլիայի» հերթական բուժզննման ժամանակ, բայց որոշեցի սկզբնական շրջանում ընտանիքիս ոչինչ չասել, քանի որ նախ ինքս պետք է համակերպեի հիվանդության հետ:
Ես շատ լավատես մարդ եմ ու բժիշկներին հարցրի` հետագայո՞ւմ էլ կարող եմ կյանքս իմ ուզածի պես անցկացնել: Բժիշկները խորհուրդ տվեցին շարունակել հավատարիմ մնալ ինքս ինձ։
Պետք է ապրենք այսօր ու այստեղ։ Ամեն օր արթնանալով՝ շնորհակալ լինենք ևս մեկ օր ապրելու համար: Շատ կարևոր է նաև ընտանիքի աջակցությունը, դուք դեռ երկար ճանապարհ ունեք անցնելու: Ձեր կյանքում թողեք միայն այն մարդկանց, ովքեր դրական ներգործություն են ունենում Ձեզ վրա»,- ասաց Խոակին Կապառոսն ու երեխաներին խորհուրդ տվեց լսել ծնողներին, կատարել բժիշկների հրահանգները ու նաև հաճախ ծիծաղել։
Խոակին Կապառոսն ընդգծեց, որ «Ժպիտների քաղաք» բարեգործական հիմնադրամի կողմից հանդիպման առաջարկը ստանալիս ոչ մի վայրկյան չի երկմտել․
«Շատ ուրախ եմ հանդիպել ձեզ։ Ոչ մի րոպե չմտածեցի։ Եթե իմ համեստ խորհուրդը կարող է ձեզ համար օգտակար լինել, ես միշտ պատրաստ եմ»,- ասաց իսպանացի մասնագետը։
Կապառոսը նաև պատասխանեց երեխաների հարցերին, որոնք հիմնականում ֆուտբոլային էին ․․․ ո՞ր թիմին է երկրպագում, ո՞ր ֆուտբոլիստներին, արդյոք կցանկանա՞ր այդ ֆուտբոլիստներին հրավիրել Հայաստանի հավաքական, և ի՞նչ է պետք ֆուտբոլիստ դառնալու համար։
«Շատ թիմեր եմ մարզել, խաղացել եմ Մադրիդի «Ռեալում», բայց իմ թիմը «Սևիլիան» է։
Շատ տաղանդավոր խաղացողների եմ մարզել․ Խեսուս Նավասը, Սերխիո Ռամոսը, Դանի Ալվեշը, Խավի Մարտինեսը, Իկեր Մունյաինը 16-17 տարեկանում խաղացել են իմ ենթակայության տակ ու իրենց նորամուտն են նշել Պրիմերայում։
Եթե հնարավոր լիներ նրանցից մի քանիսին ՀՀ քաղաքացիություն տալ, անպայման կհրավիրեի Հայաստանի հավաքական։
Իսկ ֆուտբոլիստ դառնալու համար պետք է շատ սովորել, մարզվել ու անպայման լավ սնվել»։
Երեխաներից մեկն անգամ հետաքրքրվեց՝ արդյոք ճի՞շտ է, որ Տիգրան Բարսեղյանը կարիերան շարունակելու է «Էսպանյոլում»․
«Չգիտեմ։ Երևում է՝ բավականին տեղեկացված եք, ու մեզնից ավելի շատ բան գիտեք։ Լավ է, որ հետևում եք լուրերին»։