Սեպտեմբերի 24-25-ը Լեհաստանի Սվինուժսկի քաղաքում անցկացվել է Կիոկուշին Կարատեի Եվրոպայի 34-րդ առաջնությունը, որում հայ մարզիկները բավականին հաջող ելույթներ են ունեցել: Հայաստանը ներկայացրած 16 մարզիկներից 5-ը հռչակվել են Եվրոպայի չեմպիոն, մեկ մարզիկ նվաճել է արծաթե, ևս 4 ներկայացուցիչ՝ բրոնզե մեդալներ:
Եվրոպայի առաջնության բոլոր մեդալակիրները՝
Միրզոյան Հարություն — Եվրոպայի Չեմպիոն
Մնացականյան Արտյոմ — Եվրոպայի Չեմպիոն
Կարապետյան Արեն — Եվրոպայի Չեմպիոն
Մատոյան Գոռ — Եվրոպայի Չեմպիոն
Ասատրյան Դավիթ — Եվրոպայի Չեմպիոն
Միքայելյան Արամ — Եվրոպայի առաջնության արծաթե մեդալակիր
Առուշանյան Արթուր — Եվրոպայի առաջնության բրոնզե մեդալակիր
Ղազարյան Էմիլ — Եվրոպայի առաջնության բրոնզե մեդալակիր
Աղասյան Անգելինա — Եվրոպայի առաջնության բրոնզե մեդալակիր
Բաբաջանյան Գառնիկ — Եվրոպայի առաջնության բրոնզե մեդալակիր
Հայաստանի հավաքականը մրցավայր է մեկնել Կիոկուշին Կարատեի Ազգային Ֆեդերացիայի նախագահի Սպարտակ Գասպարյանի գլխավորությամբ, ում հետ էլ ArmSport-ն ամփոփել է Եվրոպայի ավարտված առաջնությունն ու խոսել առաջիկա անելիքների մասին.
«Շատ գոհ եմ Եվրոպայի առաջնությունում մեր մարզիկների գրանցած արդյունքներից և ունեցած ելույթներից: Ինձ համար ավելի կարևոր է մենամարտերի որակը, քան մեդալների գույնը, քանի որ շատ հաճախ մեդալի գույնը կարող է լավը լինել, բայց մարտերի որակը՝ ոչ այնքան: Գուցե շատ մարդիկ իմ այս խոսքերը չհասկանան, բայց մարզիկները կհասկանան: ԵԱ-ից գոհ եմ, քանի որ ամռանը Սևանում 10-օրյա վրանային ճամբար ունեցանք, հավաքականը կազմվեց, դրանից հետո 7 օր էլ հավաք անցկացրինք մեր ակադեմիայում, ապա 10 օր էլ հավաք անցկացրինք Արցախում: Այսինքն մեկ ամիս մենք շատ լուրջ նախապատրաստական աշխատանքներ ենք տարել ու հնարավոր չէր, որ արդյունքն այսպիսին չլիներ ու որակ չտեսնեինք»:
Խոսելով Եվրոպայի ավարտված առաջնությունում գրանցված արդյունքների մասին՝ Գասպարյանն առանձնացրեց Արթուր Առուշանյանի հետ տեղի ունեցած վիճահարույց դրվագը.
«Աշխարհի միակ եռակի չեմպիոնի՝ Արթուր Առուշանյանի մենամարտի մրցավարությունը շատ վիճելի էր: Եղավ չթույլատրելի հարված ձեռքով դեմքին, բայց մրցավարները մաքուր հաղթանակ շնորհեցին մրցակցին: Տեսանյութերը կան, փորձեցինք բողոքարկել, ցավոք չստացվեց ու Առուշանյանը չկարողացավ դուրս գալ եզրափակիչ ու բավարարվեց բրոնզե մեդալով: Մյուս մեդալակիրների արդյունքներից շատ գոհ եմ»,- ասում է Սպարտակ Գասպարյանը:
Ֆեդերացիայի նախագահի խոսքով իրենք նույն տեմպով շարունակում են ու արդեն սկսել են նախապատրաստությունը նոյեմբերին կայանալիք աշխարհի առաջնությանը.
«Երկու օր հանգստանալուց հետո վերսկսեցինք մարզումները՝ նախապատրաստվելով նոյեմբերին կայանալիք Աշխարհի առաջնությանը: Շատ լուրջ ենք նախապատրաստվում ու հուսով եմ՝ նորից կկարողանանք լավ նորություններով վերադառնալ հայրենիք»,- մեզ հետ զրույցում պատմում է Սպարտակ Գասպարյանը:
Գասպարյանի խոսքով, Աշխարհի առաջնությանը նախապատրաստվելու համար իրենք այսօրվանից ուսումնամարզական հավաք կսկսեն Դավիթաշենի ակադեմիայում:
«Ինչ վերաբերում է աշխարհի առաջնության մեկնող կազմին, ապա մոտ օրերս այն կհրապարակվի. հանգստյան օրերին որոշիչ մենամարտեր կունենանք, որոնց արդյունքներով կազմի ընտրության հարցում վերջնական կկողմնորոշվենք: Կարծում եմ՝ մոտ 15 հոգանոց կազմով կմեկնենք մրցավայր»:
Նշենք՝ Աշխարհի առաջնությունը կկայանա նոյեմբերի 19-20-ը դարձյալ Լեհաստանում, սակայն արդեն Կրակով քաղաքում: