Հայաստանի Մարմնամարզության Ֆեդերացիայի նախագահ Գագիկ Վանոյանը դրամական պարգևներ է հանձնել Օլիմպիական խաղերի բրոնզե մեդալակիր Արթուր Դավթյանին, ինչպես նաև հավաքականի ավագ մարզիչ, ՕԽ-ի մրցավար Հակոբ Սերոբյանին և մարզիչ Հայկ Նազարյանին:
Այս մասին հայտնում է մարմնամարզության ֆեդերացիայի մամուլի քարտուղարությունը։
Հիշեցնենք՝ մարմնամարզիկ Արթուր Դավթյանը դարձել էր Տոկիոյում ընթացող 32-րդ ամառային Օլիմպիական խաղերի բրոնզե մեդալակիր։
Հենացատկի եզրափակչում Դավթյանը վաստակել էր 14.733 միավոր (առաջին ցատկ՝ 14.800 միավոր, երկրորդ՝ 14.666): Օլիմպիական չեմպիոնի կոչումը նվաճել է հարավկորեացի Սին Ջեհուանը (14.783 միավոր), իսկ արծաթե մեդալակիր է դարձել ռուս Դենիս Աբլյազինը (14.783 միավոր):
Այսպիսով, 41 տարի անց Հայաստանն Օլիմպիական խաղերում մարմնամարզությունից մրցանակակիր ունի. 1980 թվականին Մոսկվայում կայացած Օլիմպիական խաղերում չեմպիոն էր դարձել Էդուարդ Ազարյանը՝ Ալբերտ Ազարյանի որդին: