«Շիրակի» գլխավոր մարզիչ Տիգրան Դավթյանը ակումբի մամուլի ծառայության հետ զրույցում խոսել է թիմի նախապատրաստական շրջանի ու նոր մրցաշրջանի մասին։
— Պարոն Դավթյան, եկեք սկսենք նրանից, թե ինչպես է թիմը պատրաստվում մի քանի օրից սկսվող մրցաշրջանին։
-Նախապատրաստական շրջանն անցկացնում ենք Գյումրու ֆուտբոլի ակադեմիայում, ամեն ինչ գնում է իր հունով ինչպես, որ պլանավորված էր։
Մեր աշխատանքային ծրագիրը շատ հագեցած է, ունեցանք երկու ընկերական հանդիպում «Ուրատրու-2-ի» և «Սևանի» դեմ, տոնել ենք մեկ հաղթանակ և կրել ենք մեկ պարտություն, սակայն մեր գլխավոր նպատակն էր՝ ստուգել թիմի ֆունկցիոնալ վիճակը։ Պետք էր հասկանալ թե, որ փուլում ենք գտնվում ու ինչ դիրքի վրա պետք է ավելացնենք, իհարկե ցանկալի էր ունենալ ևս մի քանի ընկերական հանդիպում, բայց ունենք այն ինչ ունենք՝ ընդամենը երկու հանդիպում։
-Թիմից հեռացել են մի շարք ֆուտբոլիստներ, այս առաջնությունում ի՞նչ կազմով ենք հանդես գալու։
-«Շիրակը» հանդես է գալու իր դպրոցի սաներով, նրանք բոլորը հանդես են եկել «Շիրակ-2-ի» կազմում, թիմում նաև կան հնաբնակ ֆուբտոլիստներ․ ավագը՝ Արտյոմ Միքայելյանը կամ Արման Ասլանյանը և այլք։ Թիմ է վերադարձել նաև Դավիթ Ղանդիլյանը և, իհարկե, ունենք մի նոր ֆուտբոլիստ «Արարատից»՝ Գևորգ Արաբյանը։ Շատ կարևոր է ընդգծել, որ թիմը շեշտը դնում է իր ակադեմիայի սաների վրա, այդպես եղել է տարիներ առաջ «Շիրակի» լեգենդար տարիներին։ Սա հոյակապ շանս է երիտասարդ տղաների համար ցույց տալ այն ամենը, ինչի նրանք պատրաստ են։
— Արդյոք հասցրե՞լ եք ուսումնասիրել մեր բոլոր մրցակիցներին։
-Քանի որ ունեցել ենք ընկերական հանդիպում «Ուրատրու-2-ի» հետ, մանրամասն հասցրել ենք ուսումնասիրել միայն նրանց։ Ինչքան գիտենք մյուս թիմերում եղել են մեծ փոփոխություններ։ Առաջնության ընթացքում՝ խաղից խաղ կուսումնասիրենք բոլորին ավելի մանրակրկիտ և կկառուցենք մեր խաղը հենց այդ սկզբունքով։
-Ի՞նչ առաջադրանք և նպատակ է դրված թիմի առջև։
-Թե նպատակը, թե առաջադրանքը մեկն է՝ դառնալ չեմպիոն։
— Ի՞նչ կասեք մեր երկրպագուներին։
-Իհարկե Գյումրեցի երկրպագունների համար խորթ է, այն որ «Շիրակն» հանդես է գալու Հայաստանի Առաջին խմբի առաջնությունում։ Բայց ես ինքս համոզված եմ, որ մեր երկրպագուն միշտ աջակցելու է մեզ ու լինելու է մեր 12-րդ ֆուտբոլիստը։ Իմ անունից կխնդրեմ և կհորդորեմ մեր երկրպագուներին գալ մարզադաշտ ու աջակցել մեր երիտասարդ տղաներին, ինչպես որ նրանք եկել և աջակցել են ինձ ու իմ թիմակիցներին մեր երիտասարդ տարիներին։ Չափից շատ կարևոր է նրանց դերը և ներկայությունը Գյումրու Քաղաքային մարզադատում։
