ՀՀ նախագահ Արմեն Սարգսյանը, որը երեկ Տոկիոյում հետևում էր ամառային Օլիմպիական 32-րդ խաղերի բացման արարողությանն, իսկ այսօր՝ մարմնամարզիկ Արթուր Դավթյանի ելույթներին, լրագրողների հետ զրույցում կիսվել է տպավորություններով.
«Օլիմպիական այս հոյակապ սրահում գտնվելով՝ ափսոսում եմ, որ ժամանակ չեմ գտնվում սպորտով զբաղվելու:
Արթուր Դավթյանի ելույթով հիացած եմ ու հպարտ. երկրորդ թռիչքը ֆանտաստիկ էր, շատ տպավորված եմ: Հուսով եմ՝ Արթուրը դուրս կգա եզրափակիչ ու հայրենիք կվերադառնա մեդալով:
Շատ կցանկանայի մնալ մինչև եզրափակիչ ու անձամբ դիտել նրա ելույթը, բայց ցավոք չեմ կարողանա: Եկել էի բացման արարողությանը ներկա գտնվելու, որը տպավորիչ, բայց նաև ցավալի էր: Օլիմպիական խաղերի բացման արարողությունը որքան էլ՝ հիանալի էր կազմակերպված, բայց դատարկության զգացում կար՝ դատարկ ստադիոնում: Բայց սա նաև կոչ է բոլորիս՝ այս աշխարհը որտեղ մենք ապրում ենք, փոխվել է: Ֆուտբոլ են խաղում դատարկ ստադիոնում, օլիմպիական խաղեր են բացում առանց հանդիսատեսի … կարծում եմ՝ պետք է ամեն ինչ անենք հանդիսատեսով սպորտին վերադառնալու համար: Թե՛ ֆուտբոլը, թե՛ օլիմպիական խաղերն առանց հանդիսատեսի ինչ-որ տեղ իմաստ չունեն: Հենց մարզիկների համար էլ, կարծում եմ, ամբողջ իմաստը ոչ միայն հաղթանակն է, այլև՝ այն գնահատականը որ տեղում՝ ստադիոնում, երկրպագուներն իրենց ցույց են տալիս:
Երբ մեր մարզիկները ՕԽ-ի բացման արարողությանը մտան մարզահամալիր՝ հայկական եռագույնով, հպարտության մեծ զգացում ունեցա»,- նշել է Արմեն Սարգսյանը:
Գևորգ Ղազարյան՝ Տոկիոյից հատուկ ArmSport-ի համար
