Ա Սերիայի 37-րդ տուրում «Յուվենտուսը» հաղթել է «Ինտերին»։ Հանդիպումը կայացել է Թուրինի «Ալյանց-Յուվենտուս» մարզադաշտում և ավարտվել է 3-2 հաշվով։
24-րդ րոպեին Կրիշտիանու Ռոնալդուն չի իրացրել 11-մետրանոցը։ Սամիր Հանդանովիչը հեռացրել է գնդակը Ռոնալդուի հարվածից հետո, բայց պորտուգալացին առաջինն է հասել գնդակին ու երկրորդ փորձից հետո այն ուղարկել մրցակցի դարպասը։ 11 րոպե անց «Ինտերի» հարձակվող Ռոմելու Լուկակուն հավասարեցրել է հաշիվը։ Առաջին կեսի վերջնամասում էլ Խուան Կուադրադոն առաջ է մղել «Յուվենտուսին»։
55-րդ րոպեին «Յուվեի» կիսապաշտպան Ռոդրիգո Բենտանկուրը երկրորդ դեղին քարտն է ստացել՝ թուրինցիներին թողնելով 10 հոգով։ 83-րդ րոպեին Ջորջիո Կյելինին գնդակն ուղարկել է սեփական դարպասը։
Հանդիպման վերջնամասում Խուան Կուադրադոն դուբկ է ձևակերպել՝ անվրեպ իրացնելով 11-մետրանոցը։ Հիմնական ժամանակին ավելացված երկրորդ րոպեին մրցավարը հեռացրել է Մարսելո Բրոզովիչին։
«Յուվենտուսը» 75 միավոր է վաստակել ու բարձրացել Ա Սերիայի մրցաշարային աղյուսակի 4-րդ հորիզոնականը՝ գերազանցելով «Նապոլիին» (73), որն այս տուրի իր հանդիպումը դեռ չի անցկացրել։ «Ինտերը» 88 միավորով գլխավորում է աղյուսակն ու ժամանակից շուտ ապահովել է Ա Սերիայի չեմպիոնությունը։