Դարպասապահ Գոռ Մարտիրոսյանը ծնկի վիրահատության է ենթարկվել ու նվազագույնը 3 շաբաթով դուրս մնացել շարքից։ Այս մասին ֆուտբոլիստը պատմել է ArmSport-ին տված հարցազրույցում։
2020-ի հոկտեմբերին «Նորավանքը» հայտարարեց Մարտիրոսյանի հետ պայմանագիր կնքելու մասին, սակայն դարպասապահի խոսքով՝ այդ ժամանակ ինքն արդեն իսկ վնասվածքով էր ու այդպես էլ չկարողացավ վերականգնվել՝ չմասնակցելով ոչ մի հանդիպման։
«Երբ պատրաստվում էի տեղավորվել մի ակումբում, ծնկի վնասվածք ստացա, որի դեպքում վիրահատությունն անխուսափելի էր։ Վիրահատվեցի, վերականգնողական շրջանն անցա, պնդացա թե՛ հոգեպես, թե՛ ֆիզիկապես։ Արդեն պատրաստ էի մեկնարկը տալու, երբ նորից կրկնվեց վնասվածքս։ Ընդ որում վնասվածքս ստացա մի ակումբի հետ մարզման ժամանակ, որտեղ արդեն կար հետաքրքրություն միասին աշխատելու։
Ցավոք, էլի միայն վիրահատական միջամտությունը պետք է ելքը որոշեր։ Երկու օր առաջ նորից վիրահատվեցի։ Արդեն բավականին լավ եմ, սկսել եմ քայլել։ Գործում եմ բժիշկների ցուցումով, որոնք վստահեցնում են, որ անպայման կարողանալու եմ խաղալ։ 3 շաբաթ հետո արդեն կարող եմ ծանրաբեռնվածություն տալ ոտքիս»,- ասում է Գոռ Մարտիրոսյանը։
Խոսելով ֆուտբոլային կարիերայի հեռանկարների մասին՝ Գոռն ընդգծում է, որ հավատը չի կորցնում, որ նորից խաղալու է․
«Հավատում եմ, որ խաղալու եմ, ներուժս հերիք է ու պատրաստ եմ ցանկացած արդար մրցակցության մեջ մտնելու Հայաստանի առաջնության բոլոր թիմերում։ Այդուհանդերձ, չունեմ ոչ մի պայմանավորվածություն թիմերից որևէ մեկի հետ։ Հայաստանում հայ ֆուտբոլիստի համար շատ դժվար է ֆուտբոլ խաղալը։ Բայց ես ունեմ մեծ հավատ ինքս իմ ուժերին ու վստահ եմ, որ Աստված այսքան տարիների արդար քրտինքը հենց այնպես ջուրը չի գցի։ Ունեմ մեծ հավատ ու մեծ շարժառիթ՝ ընտանիքս, որն ինձ անսահման սեր, ուժ ու հավատ է ներշնչում»,- եզրափակում է իր խոսքը Գոռ Մարտիրոսյանը։