Գոռ Մարտիրոսյան. Մեծ ներուժ ունեմ ու շատ եմ ափսոսում, որ այս պահին առանց թիմի եմ

Նախքան նոր առաջնության մեկնարկը «Սևանի» դարպասապահ Գոռ Մարտիրոսյանը, որը նաև թիմի ավագն էր, հեռացավ թիմից. պայմանագիրն ավարտվել էր: Այնուհետև, դարպասապահը փորձաշրջան էր անցնում «Լոռիում», որը, ըստ նրա, առաջնության մեկնարկից օրեր առաջ հրաժարվեց պայմանագիր կնքել իր հետ և նա մնաց առանց թիմի:

Ստեղծված իրավիճակի մասին ArmSport-ը զրուցել է 27-ամյա դարպասապահի հետ:

-Գո՛ռ, պայմանագրիդ ավարտից հետո հեռացար «Սևանից». պայմանագիրը երկարաձգելու ցանկությո՞ւն, թե՞ հնարավորություն չկար:

-Պայմանագրիս ժամկետը վերջացել էր, ու չափազանց անլուրջ բաներ տեսա վերջին շրջանում: Ես հասկացել էի, որ ավելորդ է «Սևանում» մնալը: Չնայած հետո էլ հասկացա, որ նոր ղեկավարների ծրագրերի մեջ չէի մտնում: Իմ ֆուտբոլային նպատակներին հասնելու համար «Սևանը» միայն խոչընդոտ կարող էր լինել:

-Ի՞նչ անլուրջ բաների մասին է խոսքը:

-Խիստ ոչ պրոֆեսիոնալ վիճակ էր. միայն 3խաղին գրանցված տեխնիկական պարտությունը բավական է ակումբից հիասթափվելու համար…մի մրցաշրջանում չկարողանալ հաշվել դեղին քարտերի քանակը ու պարտվել «հաղթած» խաղերը:

-Իսկ դրանց պատճառները որտե՞ղ ես տեսնում:

-Պատճառները ողջ ակումբի անլուրջ մոտեցման մեջ եմ տեսնում: Երկու տարի շարունակ ասում էին, որ Բարձրագույն խմբում հանդես գալու նպատակ ունեն, բայց այդ ընթացքում ես նման բան չտեսա: Հեռանալու պահը հասունացել էր: Ուրիշ շատուշատ վատ խնդիրներ էլ կային, բայց չեմ ցանկանա մանրամասնել, որովհետև ապացույցներով չեմ կարող խոսել:

-Իսկ «Սևանից» հեռանալիս այլ ակումբից առաջարկ ունեի՞ր:

-Առաջին լիգայի երկու ակումբից առաջարկ ունեի, որոնց մերժել եմ: Առաջարկ ստացել եմ «Լոռիից», 10 օր փորձաշրջան եմ անցել այնտեղ: Մարզիչները մեծ հավանության էին ինձ արժանացրել, ակումբի սպորտային տնօրենն ասում էր, որ ես իրենց հիմնական դարպասապահը պիտի լինեմ: Ես ավելի քան վստահ էի, որ ոչ միայն մնալու եմ թիմում, այլև խաղալու եմ այնտեղ, տղաներն էլ էին այդպես մտածում: Բայց վերջին պահին ինձ ասացին, որ ակումբի նախագահն ասել է, որ չի ցանկանում ինձ հետ պայմանագիր կնքել և հարցը ֆուտբոլային չէ: Զրուցել եմ ակումբի նախագահի հետ, նա ասել է, որ նման բան չկա, դա մարզիչների ընտրությունն է: Մինչ այսօր ինձ համար անհասկանալի է՝ ինչ տեղի ունեցավ:

Հիմա արտասահմանյան Առաջին լիգաներից առաջարկներ ունեմ՝ Ալբանիայից ու Կոսովոյից: Գործակալի միջոցով կապվել են ինձ հետ, բայց մերժել եմ, որովհետև այնտեղ գնալը առաջխաղացում չեմ համարում: Եթե արտասահմանյան ակումբ ես տեղափոխվում, ապա այն պիտի գոնե Հայաստանի առաջնությունից ուժեղ լինի կամ պայմանները գոնե ավելի լավը լինեն:

-Հիմա ինչո՞վ ես զբաղվում:

-Մարզվում եմ անհատական ծրագրով ու բացի դրանից, ակումբ կա, որի մարզիչը սրտացավ է հայկական ֆուտբոլի համար: Ինձ ասել է, որ իր դռները բաց են ինձ համար. կարող եմ թիմի հետ մարզվել մինչև տեսնենք՝ ինչ կլինի: Ամենը, ինչ ինձ հետ կատարվեց վերջին րոպեին էր, ու ես այլևս որևէ թիմում տեղավորվելու ժամանակ չունեցա: Երբ «Լոռիում» ասացին, որ ինձ հետ պայմանագիր չեն կնքելու, բոլոր թիմերն արդեն կազմավորված էին, ու 3 օր հետո առաջնությունը սկսվեց:

-Իսկ ո՞ր ակումբի ու ո՞ր մարզչի մասին է խոսքը:

-Մարզվում եմ «Նորավանքի» հետ: Գլխավոր մարզիչը Վահե Գևորգյանն է: Նա ինձ վաղուց ճանաչում է, ուզում է մարզվեմ, որ, եթե ամեն պահի, որևէ թիմից կանչեն, պատրաստ լինեմ: Բայց այսօրվա վիճակը տեսնում ենք. գրեթե բոլոր ակումբները, նույնիսկ որպես երկրորդ դարպասապահ, լեգիոներ են բերում: Շատ ցավալի վիճակ է: Դրա համար էլ մեր ազգային հավաքականում արդեն այլազգի սևամորթ ֆուտբոլիստներ են խաղում: Երկու տարուց նրանց թիմն արդեն կավելանա:

-Ինչպե՞ս ես պատկերացնում հետագա կարիերադ:

-Այս պահին սպասում եմ ինչ-որ մի հնարավորության՝ արդար մտածող թիմում խաղալու: Մեծ ներուժ ունեմ ու շատ ափսոսում եմ, որ այս պահին առանց թիմի եմ…առանց մեծամտության:

-Ավելացնելու բան ունե՞ս, որի մասին չխոսվեց:

-Ընդամենը ուզում եմ ավելացնել մի բան. վերևում ամենամեծ ու ամենարդար Դատավորն է հետևում այս կյանքում տեղի ունեցող ամեն ինչին: Եթե դուք ձեր անարդարությունների՝ ֆուտբոլիստների կարիերային քար գցելու համար այս կյանքում չպատժվեք, վերևում պատժվելու եք հաստատ: Թող բոլորի սրտի ու արածի չափ Աստված իրեն տա:

Ստելլա Բաբլոյան