Վարշավայից հայ ըմբիշները վերադարձան 4 մեդալով. Մայրցամաքի լավագույններին պարզելու մրցաշարն այս անգամ աստղային չէր: Հիմնականում նույն պատճառով՝ Եվրոպայի առաջնություն չէին ներկայացել օլիմպիական ուղեգիր ունեցող առաջատար ըմբիշներից շատերը:
Ազատ ոճայինների քառյակը
Ազատ ոճի Հայաստանի հավաքականը մրցավայր մեկնեց 4 ըմբիշով: Ըստ նախնականի՝ ցուցակը կազմված էր 5 ըմբիշից, սակայն 92 կգ քաշային Մարզպետ Գալստյանը ծնկի վնասվածքի պատճառով չմեկնեց մրցավայր: Հավաքականի առաջատարներ Արսեն Հարությունյանն ու Վազգեն Թևանյանը մեկ ամիս առաջ էին մասնակցել վարկանիշային մրցաշարի ու կարիք չկար նրանց ԵԱ տանելու, որը վարկանիշային չէր Տոկիո-2020-ի համար: Մրցավայր չէին մեկնել նաև այն ըմբիշները, որոնք մայիսին մասնակցելու են վերջին օլիմպիական վարկանիշային մրցաշարին:
65 կգ քաշային կարգում Հայաստանի պատվիրակ Գևորգ Թադևոսյանը 1-2 հաշվով պարտվեց Ալի Ռահիմզադեին: Մրցավարը պասիվության համար «ժամանակ բացեց», սակայն 2 դեպքում էլ երիտասարդ ըմբիշը միավոր չկարողացավ վաստակել: Պասիվության ու 30 վայրկյանում միավոր չվաստակելու համար մեկ միավոր էլ տրվեց Թադևոսյանին: Ռահիմզադեն պարտվեց կիսաեզրափակչում ու Թադևոսյանը լքեց պայքարը:
70 կգ քաշային կարգում շատ լավ գոտեմարտեր անցկացրեց 2020 թ-ի աշխարհի անհատական գավաթի խաղարկության բրոնզե մեդալակիր Արման Անդրեասյանը: Ժամանակից շուտ հաղթանակ՝ 1/8 եզրափակչում, 10-5 հաշվով հաղթանակ՝ ¼ եզրափակչում, սակայն կիսաեզրափակչում Արմանը անչափ համառ գոտեմարտի արդյունքում 3-5 հաշվով պարտվեց ապագա չեմպիոն Իսրայիլ Կասումովին: Բրոնզե մեդալն Անդրեասյանը վիճարկեց Միխայիլ Սավայի հետ ու հաղթեց 4-3 հաշվով:
74 կգ քաշային կարգում Հայաստանը ներկայացրեց Հրայր Ալիխանյանը: Վերջինս անցկացեց 1 գոտեմարտ ու պարտվեց ժամանակից շուտ: Մրցակիցը՝ Ռազամբեկ Ժամալովը չհասավ եզրափակիչ ու Հրայրի համար առաջնությունն ավարտվեց:
Հակասական տպավորություն թողեց 79 կգ քաշային կարգում Հայաստանի ներկայացուցիչ Արման Ավագյանը: Արմանը 4 գոտեմարտ անցկացրեց, 4-ն էլ ավարտվեց ժամանակից շուտ. 2 հաղթանակ, 2 պարտություն: Ավագյանը հնարավորություն ստացավ սփոփիչ գոտեմարտ անցկացնելու, որտեղ հաղթեց, իսկ բրոնզե մեդալի համար գոտեմարտում 47 վայրկյանում պարտվեց Նիկա Կենտչաձեին:
Հունահռոմեականների եռյակը
Հունահռոմեականներն այս անգամ մրցավայրից վերադարձան 3 մեդալով: Ի տարբերություն ազատ ոճայինների, հունահռոմեականները մրցավայր էին մեկնել 7 ըմբիշով: Բացակայում էին Արթուր Ալեքսանյանը, Դավիթ Օվասապյանն ու Կարեն Ասլանյանը, որը շուտով մասնակցելու է օլիմպիական վարկանիշային մրցաշարի:
Եվրոպայի այս առաջնությունում 55 կգ քաշային կարգում լավ տպավորություն թողեց Ռուդիկ Մկրտչյանը: Մկրտչյանն ընդամենը 2 գոտեմարտ անցկացրեց, բայց 2-ում էլ շատ լավ տեսք ուներ: Պայքարը սկսեց քառորդ եզրափակչից ու գերլարված գոտեմարտի արդյունքում 4-5 հաշվով պարտվեց Էկրեմ Օզթուրքին: Վերջինս հասավ եզրափակիչ, իսկ Մկրտչյանը բրոնզե մեդալի համար գոտեմարտի հնարավորություն ստացավ : Մեդալային պայքարը տևեց 1 րոպե. Ռուդիկը ժամանակից շուտ հաղթեց Արտյոմ Կացարին ու մեծահասակների առաջնություններում նվաճեց իր առաջին մեդալը:
60 կգ քաշային կարգում Եվրոպայի 2020 թ-ի չեմպիոն Գևորգ Ղարիբյանը լավ սկսեց մրցաշարը՝ ժամանակից շուտ պարտության մատնելով Իրակլի Ձիմիստարիշվիլիին: Քառորդ եզրափակչում Գևորգը ոչինչ չկարողացավ առաջարկել Ռազվան Արնաուտին ու պարտվեց 0-3 հաշվով: Վերջինս կիսաեզրափակչում ժամանակից շուտ պարտվեց ու Գևորգի համար մրցաշարն ավարտվեց:
63 կգ քաշային կարգում լավ տեսք ուներ Հրաչյա Պողոսյանը, սակայն ինչ-որ տեղ նաև փորձի պակասը խանգարեց Պողոսյանին՝ մեդալ նվաճելու հարցում: ՄԵկնարկում վստահ հաղթանակ՝ 6-0 հաշվով: Քառորդ եզրափակչում սկզբունքային գոտեմարտում Պողոսյանը մինչև վերջին վայրկյանները 2-0 հաշվով հաղթում էր ադրբեջանցի Թալեհ Մամեդովին, սակայն վերջում 2 միավոր տվեց ու պարտվեց 2-2 հաշվով: Մամեդովը հասավ եզրափակիչ, Պողոսյանը հաղթեց սփոփիչ գոտեմարտում ու բրոնզե մեդալի համար պայքարելու հնարավորություն ստացավ: Մեդալային պայքարում Պողոսյանն առաջին մրցափուլից հետո 5-0 հաշվով հաղթում էր Ալեքսանդրս Յուրկյանսին, սակայն երկրորդ մրցափուլում 7 միավոր տվեց ու պարտվեց 5-7 հաշվով:
67 կգ քաշային կարգում գերազանց տպավորություն թողեց Սլավիկ Գալստյանը: Արդեն 2 տարի է՝ թվում է, որ հասունացել է Սլավիկին ամենաբարձր աստիճանին կանգնած տեսնելու պահը, սակայն ամեն անգամ ինչ-որ բան խանգարում է: Մեկը մյուսի հետևից ժամանակից շուտ փայլուն հաղթանակներ ու Գալստայնը հասավ կիսաեզրափակիչ, որտեղ մրցավարական կասկածելի որոշման հետևանքով Գալստյանը 4-5 հաշվով պարտվեց: Գոտեմարտի ավարտից 1 րոպե 45 վայրկյան առաջ գորգի մրցավարը տուշեով հաղթանակ ֆիքսեց, սակայն մրցակցի չելենջի արդյունքում մրցավարները խախտում նկատեցին Գալստյանի գործողություններում: Մրցակցին տվեցին 2 միավոր ու վերևից աշխատելու հնարավորություն: Մնացած հատվածում արդեն Սլավիկը չկարողացավ միավոր վաստակել ու պարտվեց 4-5 հաշվով: Իսկ այն, ինչ արեց բրոնզե մեդալի համար գոտեմարտում, ցույց տվեց, որ մեր բարձրահասակ ըմբիշն ուներ բոլոր հնարավորությունները Եվրոպայի չեմպիոն դառնալու. 3-րդ՝ ժամանակից շուտ առանց միավոր տալու հաղթանակ:
72 կգ քաշային կարգում այս էլ արդեն երկրորդ անգամ Մալխաս Ամոյանին մեկ քայլ չի բավականացնում: 2020 թ-ին Բելգրադի աշխարհի անհատական գավաթի խաղարկության եզրափակչում Ամոյանը պարտվեց 1-1 հաշվով, սակայն ուներ բոլոր հնարավորությունները հաղթանակի հասնելու համար: Վարշավայի եզրափակիչ հասնելու ճանապարհին Մալխասը ոչ մի խոչընդոտի չհանդիպեց: 3 փայլուն հաղթանակ, ընդհանուր՝ 20-0 հաշվով: Եզրափակչում Ամոյանի մրցակիցը օլիմպիական խաղերի մեդալակիր Շմագի Բոլկվաձեն էր: Առաջին մրցափուլում մեր ըմբիշն ակտիվ էր ու ստացավ մեկ միավոր՝ վերևից աշխատելու հնարավորությամբ: Մալխասը մրցակցին կտրեց գորգից, սակայն չկարողացավ հնարքի գնալ: Մրցավարը ըմբիշներին հրավիրեց գորգի կենտրոն, իսկ Մալխասը պահանջեց չելենջ նետել, քանի որ կարծում էր, որ մրցակցիը ոտքով խանգարել է իրեն: Կրկնապատկերի ժամանակ տեսանք, որ Բոլկվաձեն խանգարում էր ոտքով, սակայն մրցավարները չելենջը պարտված ճանաչեցին ու նաև մրցակցին ևս 2 միավոր տվեցին՝ Ամոյանին «փակելու» համար, սակայն դա արդեն տեղի էր ունեցել գորգի սահմաններից դուրս: Հետագայում պասսիվության համար Ամոյանը ևս մեկ միավոր տվեց մրցակցին ու պարտվեց 1-4 հաշվով:
77 կգ քաշային կարգում Վարուժան Գրիգորյանը 1/8 եզրափակչում 0-9 հաշվով պարտվեց Յունուս Էմրե Բաշարին: Վերջինս հասավ եզրափակիչ, սակայն Գրիգորյանը պարտվեց նաև սփոփիչ գոտեմարտում:
82 կգ քաշային կարգում Կարապետ Չալյանը գոտեմարտեց անչափ ծանր գրաֆիկով: Պայքարը սկսեց որակավորման փուլից ու ժամանակից շուտ հաղթեց ֆին մրցակցին: Այնպես ստացվեց, որ ընդամենը 15 րոպե հետո կրկին պետք է Չալյանը գոտեմարտեր թարմ ապագա չեմպիոն Ադլան Ակիևի հետ: Այդ գոտեմարտում Չալյանը պարտվեց 3-5 հաշվով: Ակիրը հասավ եզրափակիչ, իսկ Կարոն 2 սփոփիչ պետք է անցկացներ՝ մեդալային պայքարի մեկնարկից մոտ մեկ ժամ առաջ: 2 գոտեմարտում էլ հաղթեց Չալյանը, սակայն արդեն բրոնզե մեդալի համար գոտեմարտում մեր օլիմպիական ուղեգրերից մեկի տիրակալը 2-3 հաշվով պարտվեց վրացի Աիվենգո Ռիկաձեին:
Արմեն Գարամյան
