Դեկտեմբերին Հայաստանի Պրեմիեր լիգան գնաց ձմեռային դադարի։ Մրցաշարային աղյուսակին նայելով՝ պարզ է դառնում, թե որքան լարված պայքար է ծավալվելու գարնանային հատվածում։
Մասնավորապես, «Արարատը», «Արարատ-Արմենիան» ու «Ալաշկերտը» հավասար 18 միավոր ունեն։ Աղյուսակը գլխավորում են Վարդան Բիչախչյանի սաները։ Երկրի գործող չեմպիոնն էլ մեկ խաղ պակաս է անցկացրել։
Առաջատարներից մեկ միավորով հետ է մնում Վանաձորի «Լոռին»։ 16 միավորով 5-րդ տեղում է Հայաստանի գավաթակիր «Նոան»։ Մեկ միավորով էլ «Նոայից» հետ է մնում «Ուրարտուն»։ Առաջնության նորեկ «Վանը» 10 միավոր ունի ու տեղավորվել է 7-րդ տեղում։ ՀՊԼ ընթացիկ մրցաշրջանից առաջ կազմը հիմնովին փոխած Գյումրիի «Շիրակը» վաստակել է ընդամենը 5 միավոր ու տեղավորվել նախավերջին տեղում։ Իսկ Հայաստանի բազմակի չեմպիոն «Փյունիկը» նույնքան միավորով եզրափակում է մրցաշարային աղյուսակը։
ArmSport-ը շարունակում է ներկայացնել՝ ինչով են զբաղված մեր առաջնության թիմերը նախքան մրցաշարի մեկնարկը։
Հայաստանի գործող գավաթակիր «Նոան», որը մարզումները վերսկսել էր հունվարի 13-ից, հունվարի 29-ին մեկնել է Դուբայ՝ ուսումնամարզական հավաքի․ թիմն այնտեղ կմնա մինչև փետրվարի 12-ը։ Այս ընթացքում նախատեսված 4 ստուգողական խաղերից 3-ը թիմն արդեն անցկացրել է։ Երևանյան թիմը 0-3 հաշվով պարտվել է «Զենիթին», 6-0 հաշվով ջախջախել «Ատլետիկո Արաբիային» և նվազագույն հաշվով հաղթել «Ռիգային»։ Փետրվարի 11-ին մեր թիմը ուժերը կչափի «Ռոդինայի» հետ։
Դադարի ընթացքում ակումբն ունեցել է մի շարք համալրումներ, դա վերաբերում է նաև մարզչական շտաբին, որին ևս երկու մասնագետ է միացել Դմիտրի Կուդրյաշովը և Ալեքսեյ Գորշկովը։ Թիմի կազմը համալրել են կիսապաշտպաններ Վադիմ Պայռելը, Աշոտ Ադամյանը, Պավել Կիրեենկոն, Դոբրիվոյե Վելեմիրը, Յարոսլավ Մատվիենկոն, հարձակվողներ Գեղամ Հարությունյանն ու Անդրեյ Տիտովը և պաշտպան Ջեֆֆերսոն Օլիվեիրան։
Եղել են նաև հեռացողներ․ ավարտվել են Դանու Սպատառուի, Պավել Դեոբալդի հետ պայմանագրերի ժամկետները, երկկողմ համաձայնությամբ խզվել են Արտյոմ Սիմոնյանի, Սոսլան Կագերմազովի և Դմիտրի Լավրիշչևի պայմանագրերը։
«Ուրարտուն», որն ընդամենը մեկ միավորով է հետ մնում «Նոայից» մարզումները վերսկսել է հունվարի 6-ին։
Թիմը դադարի ընթացքում անցկացրել է նաև ստուգողական խաղեր․ 2-2 ավարտել «Փյունիկի» հետ խաղը, 1-1՝ «Արարատի», 6-0 հաշվով ջախջախել «Ալաշկերտին» և խոշոր՝ 0-3 հաշվով պարտություն կրել «Վանից», իսկ օրեր անց նվազագույն հաշվով կարողացել հաղթանակի հասնել «Ալաշկերտի» նկատմամբ։ Թիմը փետրվարի 10-ին կմրցի ԲԿՄԱ-ի, իսկ 15-ին՝ «Սևանի» հետ։
Այս ընթացքում թիմից հեռացել են Պավել Ստեպանեցը, Ռոբերտ Դարբինյանը և Եվգենի Օսիպովը։
Երևանյան թիմի կազմը համալրել է Վադիմ Պարամոնովը։ Ակումբի մամուլի ծառայությունից տեղեկանում ենք, որ ևս մեկ խաղացողի ձեռք բերելու մասին առաջիկայում կհայտարարվի։
Ինչպես ավելի վաղ տեղեկացրել էինք՝ «Ուրարտու 2»-ը օրերս հավաքի մեկնեց ԱՄԷ։ Ակումբի մամուլի ծառայությունից ArmSport-ին տեղեկացրեցին, որ գլխավոր թիմը ուսումնամարզական հավաքն անցկացնում է սեփական մարզաբազայում։ Սա պայմանավորված է միայն թիմի գլխավոր մարզչի կազմած սխեմայով՝ կապված խաղադաշտերի հետ, քանի որ առաջիկա խաղերը թիմն անցկացնելու է արհեստական խոտածածկով դաշտում, իսկ դրսում պիտի մարզվեին բնական խոտածածկի վրա։
ՀՊԼ նորեկ «Վանը», որը ևս արդեն մոտ մեկ ամիս է վերսկսել է մարզումները, այս ընթացքում խզել է մի շարք ֆուտբոլիստների հետ պայմանագրեր։ Այսպիսով, թիմից հեռացել են Էբերտ Կարդոսո Դա Սիլվան, Մուսլիմ Բամմատգերեևը, Մեդիա Լադջի Տրաորեն, Միհրան Մանասյանը, Դավիթ Ղանդիլյանը, Արման Խաչատրյանը, Միքայել Գնոլոուին, Դավիթ Այվազյանը, Օրբելի Համբարձումյանը, Միհրան Պետրոսյանը, Լիե Պատո Նգավուկա-Ցեկեն, Աշոտ Այվազյանը, Ստանիսլավ Եֆիմովը։
Թիմը ընկերական խաղեր է անցկացրել «Փյունիկի», «Ուրարտուի», «Ալաշկերտի» հետ ու հաղթել համապատասխանաբար 2-0, 3-0 և 1-0 հաշիվներով։ Փետրվարի 6-ին ԲԿՄԱ-ի դեմ խաղում թիմը 1-3 հաշվով պարտություն է կրել։
Այս ընթացքում փոփոխություններ են տեղի ունեցել նաև մարզչական շտաբում․ գլխավոր մարզչի պաշտոնում նշանակվել է ռուս մասնագետ Կոնստանտին Զայցևը, իսկ օգնականներն են Միխայիլ Գալայդիչը և դարպասապահների մարզիչ Նիկիտա Իլյինը։ Թիմի կազմը համալրել են նաև հարձակվող Ալեքսանդր Մակսիմենկոն, կիսապաշտպաններ Վլադիսլավ Վասիլյևը, Մաքս Ժեստարևը, պաշտպաններ Ռուսլան Իսաևը, Ալեքսանդր Օգանիսյանը, Դեու Դոսան և դարպասապահ Դավիդ Պապիկյանը։
Ակումբի մամուլի ծառայությունից ArmSport-ին տեղեկացրեցին, որ թիմը արտասահմանյան հավաք անցկացնել չի նախատեսում ու մարզումներն անցկացնում է Չարենցավանում։
«Փյունիկը» արձակուրդից վերադարձավ Եղիշե Մելիքյանի՝ թիմի գլխավոր մարզչի պաշտոնում նշանակվելու մասին լուրով։
Թիմ է վերադարձել պաշտպան Արման Հովհաննիսյանը։ «Փյունիկին» են միացել պաշտպաններ Իգոր Գոնչարը, Անտոն Բրատկովը, Ռոբերտ Դարբինյանը, կիսապաշտպաններ Միկիտա Տատարկովը, Հիգոր Ռոդրիգես Բարբոսա Լեյտեն, Հովհաննես Հարությունյանը, Ռոմել Իբառան, դարպասապահ Գերման Պենկովը, հարձակվող Խոսե Մանուել Բալսա Լեսկանոն։
Հեռացել են Ստեֆեն Ալֆրեդն ու Արտյոմ Գաբելոկը։
Մելիքյանի գլխավորությամբ ֆուտբոլիստները հավաք անցկացրեցին նախ Երևանում, որտեղ 3 ընկերական խաղ ունեցան․ «Ուրարտու» — «Փյունիկ»` 2-2, «Փյունիկ» — «Վան»` 0-2, «Փյունիկ» — «Վեսթ Արմենիա»՝ 1-1։
Հիմա «Փյունիկը» ուսումնամարզական հավաքի է ԱՄԷ-ում, որտեղ արդեն հասցրել է մի քանի ընկերական խաղ անցկացնել․ մեր թիմը նվազագույն հաշվով հաղթել է «Ռոդինային» և 2-3 պարտվել Սոլիգորսկի «Շախտյորին»։ Վաղը՝ փետրվարի 9-ին, մեր թիմի մրցակիցը նորից կլինի Սոլիգորսկի «Շախտյորը»։
VBET ՀՊԼ գարնանային հատվածը կմեկնարկի մարտի 1-ին։ Այդ օրը կմրցեն «Շիրակ»-«Փյունիկ» և «Արարատ»-«Վան» զույգերը։
Կարդացեք նաև՝ «Նախապատրաստվելով գարնանային հատվածին․ ինչով են զբաղված ՀՊԼ թիմերը ՄԱՍ-1»-ը:
Ստելլա Բաբլոյան