Լեգենդ, թե՞..․Մեսսիի պայմանագրի հետքերով

El Mundo-ն երեկ հոդված էր հրապարակել՝ «Պայմանագիր, որը ոչնչացրեց Բարսելոնան» վերնագրով, ըստ որի հայտնի են դարձել հարձակվող Լիոնել Մեսսիի՝ կատալոնական «Բարսելոնայի» հետ պայմանագրի մանրամասները, որը ստորագրվել է 2017 թվականին։

Նշվում է, որ համաձայնագրի չորս տարիների ընթացքում արգենտինացին վաստակել է 555 միլիոն եվրո, ընդ որում՝  78 միլիոն եվրոն նա ստացել է որպես հավատարմության բոնուսներ, իսկ 115 մլն եվրոն՝  պարզապես պայմանագիրը երկարաձգելու համար։ Հիշեցնենք, որ արգենտինացու պայմանագրի ժամկետը լրանում է 2021 թվականի հունիսի 30-ին:

Այսպիսով, ֆուտբոլի պատմության մեջ ամենամեծ պայմանագիրը ունի այսպիսի տեսք:

💰 4 տարվա պայմանագրի ընդհանուր արժեքը 555,237,619 եվրո է: Ժամկետը լրանալուց 5 ամիս առաջ Մեսսին պայմանագրով արդեն վաստակել է 511 540 545 եվրո:

💰 Պայմանագիրը նախատեսում է 1,168,964 եվրո պարգևավճար մրցաշրջանի 60% խաղերին մասնակցելու համար:

💰 3,548,644 եվրո պարգևավճար՝ Չեմպիոնների լիգայի եզրափակչում հաղթելու համար, և 1,656,034 եվրո՝ Չեմպիոնների լիգային մասնակցելու համար: Իսպանիայի գավաթում տարած հաղթանակը գնահատվում է 104 372 եվրո:

💰 Պայմանագրի երկարացման բոնուս ` 115,225,000:

💰 Հավատարմության բոնուս ՝ գրեթե 78 միլիոն (77 929 955):

Արդյունքում, Lեոն ստանում էր միջինը 138 միլիոն մեկ մրցաշրջանում ՝ հաշվի առնելով բոնուսները: Եվ չնայած նրան, որ այդ գումարի մոտ կեսը գնում է հարկերի վճարմանը, միևնույն է գումարը ստացվում է ավելի քան տպավորիչ։

Եվ ամենատարօրինակը՝ Մեսսին իրավունք ուներ միակողմանիորեն խզել պայմանագիրը, եթե Կատալոնիան անկախություն ստանար:

✅ Ակումբի արձագանքը

Փաստացի՝ ակումբը չի հերքել սկանդալային փաստաթղթի առկայությունը, սակայն այդ ամենից հետո կատալոնական ակումբն իր պաշտոնական կայքում հայտարարություն է տարածել թիմի հարձակվող  Լիոնել Մեսսիի՝ պայմանագրի տվյալների արտահոսքի հետ կապված իրավիճակի վերաբերյալ: «Բարսելոնան» մտադիր է դատի տալ El Mundo- ին, ասվում է թիմի մամուլի հաղորդագրության մեջ:

««El Mundo» պարբերականում այսօր հրապարակված տեղեկատվությունը «Բարսելոնայի» և ֆուտբոլիստ Լիոնել Մեսսիի միջև կնքված պայմանագրի վերաբերյալ, բացառապես մասնավոր փաստաթուղթ է, որը կարգավորվում է կողմերի գաղտնիության սկզբունքով, ուստի ակումբը ցավում է, որ այն հրապարակվել է:

«Բարսելոնայի» գլխավոր մարզիչ Ռոնալդ Կումանը մեկնաբանել է հարձակվող Լիոնել Մեսսիի պայմանագրի տվյալների արտահոսքը մամուլում։

«Ով էլ՝ հայտնած լինի Մեսսիի պայմանագրի մանրամասները, ապագա չի կարող ունենալ «Բարսելոնայում»: Այն ամենն, ինչ գրվել է մամուլում Մեսսիի մասին, արվել է չար մտադրությամբ: Մենք պետք է փորձենք հասկանալ, թե դա ինչպես կարող էր հայտնվել մամուլում: Մենք պետք է կենտրոնանանք մեր մրցաշրջանի վրա: Վերջին շրջանում թիմի մոտ ամեն ինչ կարգին է: Մենք շատ խաղեր ենք հաղթել: Մենք չպետք է կենտրոնանանք այդ հարցի վրա, բայց կան մարդիկ, ովքեր ցանկանում են վնասել «Բարսելոնային» և Մեսսիին»,- Կումանի խոսքերն է փոխանցում Goal-ը:

Իր հերթին «Բարսելոնայի» նախկին նախագահ Խոսեպ Մարիա Բարտոմեուն մեկնաբանել է թիմի հարձակվող Լիոնել Մեսսիի՝ ակումբի ղեկավարությանը դատի տալու որոշումը՝ նրա պայմանագրի տվյալների՝ համացանց արտահոսքի պատճառով․

«Սա շա լուրջ խնդիր է: Պրոֆեսիոնալ պայմանագրերի արտահոսքը միանգամայն անօրինական է: Հեռուստացույցով խոսելն ու մեղադրելը հեշտ է, բայց մենք չենք կատակում, քանի որ ամեն ինչ կավարտվի դատարանում: Ընդ որում, պրոֆեսիոնալ և կոմերցիոն տեսանկյունից Լեոն միանգամայն իրավացիորեն է մեղադրում: Առանց պանդեմիայի «Բարսան» հեշտությամբ կարող է վճարել այդ գումարները»,- Բարտոմեուի խոսքերն է փոխանցում Marca-ն:

💰 Ֆինանսական խնդիրներ ակումբում

Ակումբի նախագահի պաշտոնակատար Կառլես Տուսկետսը դեկտեմբերին ասել էր, որ արգենտինացուն պետք է թույլատրվեր հեռանալ 2020 թվականին. «Տնտեսական տեսանկյունից ես Մեսսիին կվաճառեի անցած ամառ: Դա ցանկալի կլիներ: Դուք պետք է հաշվի առնեք եկամտի և ծախսերի խնայողությունը: Լա Լիգան պահանջում է աշխատավարձերի սահմանափակումներ »:

Իսկ վերջերս AS-ի գլխավոր խմբագիր Ալֆրեդո Ռելագնոն բացատրել է կատալոնական ակումբի ֆինանսական խնդիրների պատճառը․ «Մեսսիի բարելավված պայմանագրերը ֆինանսական վնաս է պատճառել ակումբին: Նաև այն պատճառով, որ դա նաև բարձրացրեց թիմակիցների աշխատավարձերը»:

Նշենք, որ «Բարսելոնան» բյուջեի ահռելի մասը՝ 85% -ը ծախսում է աշխատավարձերի վրա, մինչդեռ Եվրոպական ակումբների ասոցիացիան առաջարկում է ոչ ավելի, քան 70%:

«Իհարկե, համաճարակը ազդել է բոլորի վրա, բայց դա հատկապես հարվածեց «Բարսային», քանի որ նրանց քաղաքը կարևոր նշանակություն ունի զբոսաշրջիկների համար, ովքեր մեծ գումար են ուղղում նաև դեպի մարզադաշտ և նրա VIP սրահներ, ակումբի թանգարան և պաշտոնական խանութ: Ակումբը պատրաստ չէր դրան: Նրանք Նեյմարի համար ստացած 222 միլիոն եվրոն ծախսել են Կոուտինյոյի (165 միլիոն) և Դեմբելեի (145 միլիոն) վրա ՝ նրանց համար նշանակելով նույնքան խենթ աշխատավարձեր: Դա նրանց թիմակիցներին ստիպեց թակել նախագահի դուռը՝ ավելի շատ գումար խնդրելու համար: Երբ կորոնավիրուսը հայտնվեց և դադարեցրեց ամեն ինչ, «Բարսայի» ծախսերը միայն երկինք բարձրացան»,- ասել է Ռելագնոն։

«Բարսելոնան» ֆուտբոլիստներին չի վճարել դեկտեմբերին, հայտնում է COPE-ը: Կատալոնական ակումբի ֆուտբոլիստները վարձատրվում են երկու փուլով՝ հունիսին և դեկտեմբերին: Այս անգամ ֆուտբոլիստները չեն ստացել դեկտեմբյան վճարները: Ավելի վաղ հայտնի էր դարձել, որ «Բարսելոնան» հայտարարագրել է մոտ 1,2 մլրդ եվրո պարտք, ինչպես նաև կարճաժամկետ պարտավորություն 730 մլն եվրոյի չափով:

Կատալոնացիները 2019/20 մրցաշրջանն ավարտել են 488 մլն եվրո մաքուր պարտքով, և ակումբը բանակցություններ է վարում իր վարկատուների հետ՝ այս վճարումների հետաձգման վերաբերյալ՝ մատնանշելով այն ազդեցությունը, որ կորոնավիրուսն ունեցավ բյուջեի վրա:

Մեսսին կհեռանա՞

Մեսսին առաջիկա օրերին կհայտարարի ակումբից հեռանալու մասին: Այս մասին հաղորդում է caughtoffside-ը: Աղբյուրի հաղորդմամբ, այս որոշումը պայմանավորված է ֆուտբոլիստի պայմանագրի վերաբերյալ տվյալների արտահոսքով: Հաղորդվում է, որ այս արտահոսքը վրդովեցրել է հարձակվողին և արգենտինացին արդեն նախազգուշացրել է «Բարսելոնային», որ մտածում է թիմից հեռանալու մասին:

El Mundo-ն գրում է՝ «Պայմանագիր, որը ոչնչացրեց Բարսելոնան», գումարած՝ ոմանց կողմից էլ ակումբի բոլոր խնդիրների պատճառը վերագրվում է Մեսսիին․․․ բայց դա արդյո՞ք ճիշտ է․․․ ։ Որքան էլ պահանջեր ֆուտբոլիստը, առաջին հերթին գործատուն՝ ակումբը, ինքն է կայացրել որոշումը՝ ամեն գնով պահել թիմում գերաստղին։ Եվ ինչպես արդեն վերը նշեցինք, խնդիրները կապված են նաև ոչ ադեկվատ տրանսֆերային քաղաքականության հետ և․․․ այսպես շատ կարող ենք վերլուծել, թե ինչո՞ւ այսպես, ինչո՞ւ այնպես․․․ Մեսսիի հեռանալու մասին ևս արդեն շատ ենք խոսել, տարբեր նորությունների անդրադարձել, և կհեռանա՞ արդյոք ֆուտբոլիստը Կատալոնիայից, եկեք ձեռնպահ մնանք այս անգամ վերլուծություններ անելուց։

Ցավոք, կատալոնական գրանդին վերջին շրջանում ավելի շատ անդրադառնում ենք սկանդալների կոնտեքստով, քան խաղային։ Այս փոթորիկն էլ կանցնի, «Բարսան» ժամանակի ընթացքում դուրս կգա այս ճգնաժամից, և այժմ հետաքրքիր է մեկ այլ պահ․ ինչպե՞ս կհիշեն Մեսսիին Կատալոնիայում՝ թիմի լեգենդ և հաղթանակների գրավական, թե՞․․․