Անգլիայում կարանտինայում շրջանում շատերը չեն կարողանում վարսավիրանոցներ գնալ, այդ իսկ պատճառով ստիպված են ոճային սանրվածքներ ստանալ տան պայմաններում:
Թվիթերում տարածված տեսանյութերից մեկում տղան՝ «Չելսիի» մարզաշապիկով, խնդրում է, որ հայրն իրեն այնպիսի սանրվածք անի, ինչպիսին Կրիշտիանու Ռոնալդուինն է, և նրան ցույց է տալիս Կրիշտիանու Ռոնալդուի՝ «Յուվենտուսի» մարզաշապիկով լուսանկարը:
Սակայն հայրն այլ ծրագրեր ուներ. նա որդու մազերը կտրում է բրազիլացի Ռոնալդոյի՝ ԱԱ-2002-ի ոճով.
There’s only one Ronaldo! 😂😂😂 pic.twitter.com/lNAGpB4Mxz
— Lloydy (@Lloydy3217) April 4, 2020
Տղան, վշտացած այն բանից, թե ինչ տեսք ունի, հորը «հիմար» է անվանում, իսկ հայրը, ծիծաղելով, ասում է՝ «Կա միայն մեկ Ռոնալդո»: Նա ցույց է տալիս բրազիլացի հարձակվողի լուսանկարը:
Անձամբ Ռոնալդոն մի անգամ նշել է, որ նման սանրվածք էր արել ուշադրությունն իր վնասվածքներից շեղելու համար.
«Ես ոտքի վնասվածք ունեի ու բոլորն այդ մասին էին խոսում: Որոշեցի սափրել գլուխս, բայց մի փոքր հատված թողնել: Եկա մարզման ու բոլորն ինձ տեսան սարսափելի սանրվածքով: Բոլորն այդ մասին էին խոսում ու մոռացան իմ վնասվածքի մասին: Ես կարողացա հանգստանալ, թուլանալ և կենտրոնանալ մարզումների վրա:
Չեմ հպարտանում իմ այդ սանրվածքով. այն շատ տարօրինակ էր: Բայց դա հիանալի հնարավորություն էր խոսակցությունների թեման փոխելու համար»,- ասել է Ռոնալդոն:
Հիշեցնենք՝ ԱԱ-2002-ի եզրափակչում Ռոնալդոն դուբլի հեղինակ դարձավ Գերմանիայի հետ խաղում, ինչը Բրազիլիային թույլ տվեց 2-0 հաշվով հաղթանակ տանել: Հարձակվողի հենց այս ֆենոմենալ ելույթների արդյունքում էլ նրա սանրվածքն իսկապես լեգենդար դարձավ:
