Առաջին խմբի առաջնությունում «Ուրարտու-2»-ը երրորդ անընդմեջ հաղթանակն է տոնել։ Չորրորդ տուրի «Նորավանքի» հետ կայացած խաղից հետո ակումբի պաշտոնական կայքի հետ զրույցում տպավորություններով կիսվել է դաշտի կենտրոնից գեղեցիկ գոլի հեղինակ դարձած Գոռ Լուլուկյանը։
ՄՐՑԱՇՐՋԱՆԻ ՄԵԿՆԱՐԿԸ՝ ԹԻՄԻ ՀԱՄԱՐ
«Կարծում եմ՝ մրցաշրջանը վատ չենք մեկնարկել, մեկ խաղ ենք ձախողել, մյուս երեքում կամային հաղթանակներ ենք տոնել։ Ամեն ինչ անում ենք՝ ամեն խաղում ավելի լավ հանդես գալու համար»։
«ՆՈՐԱՎԱՆՔԻ» ՀԵՏ ԽԱՂԻ ՄԱՍԻՆ
«Դժվար խաղ ստացվեց, առաջնության ամենաբարդ թիմերից մեկն էր ու շատ կարևոր էր հաղթանակ տոնելը, կրկին առաջինը գոլ բաց թողեցինք ու դարձյալ ինքնագոլով, բայց միանգամից կարողացանք հավասարեցնել հաշիվը, ինչը շատ կարևոր էր առաջին հերթին հոգեբանական առումով։ Երկրորդ խաղակեսն էլ ակտիվ ստացվեց, կարողացանք գոլ խփել ու փորձեցինք արդեն պահել հաշիվը, խաղավերջում «Նորավանքը» լավ պահ ունեցավ, բայց, բարեբախտաբար, դարպասաձողը օգնության հասավ մեզ ու կարողացանք հերթական 3 միավորը վաստակել երրորդ խաղն անընդմեջ»։
ԳՈԼԻ ՈՒ ՏՊԱՎՈՐՈՒԹՅՈՒՆՆԵՐԻ ՄԱՍԻՆ
«Մինչև հարվածելս նկատել էի, որ դարպասապահը դուրս էր եկել իր դիրքից։ Հարմար առիթ էր, փորձեցի ու ստացվեց: Եթե անկեղծ, տղաների էմոցիաները ավելի շատ էին ու, տեսնելով նրանց ուրախությունը, նոր հասկացա՝ ինչ է կատարվում: Գեղեցիկ գոլեր շատ եմ խփել, բայց նման բարձր մակարդակում սա լավագույնն էր։ Ինձ համար ավելի նշանակալից էր գոլի կարևորությունը, քան նրա գեղեցկությունը»։
ԹԻՄԻ ՆՈՐԵԿՆԵՐԻ ՄԱՍԻՆ
«Նոր ֆուտբոլիստները նոր շունչ են բերել իրենց հետ և ավելի հետաքրքիր դարձրել թիմի խաղը, վստահ եմ, որ գնալով ավելի ենք ուժեղանալու ու փորձելու իրագործել այն խնդիրները, որոնք մեր առջև դրել ենք»։
