Հայ-մակեդոնական հերթական դիմակայությունը. Ալաշկերտը ևս մտնում է պայքարի մեջ

ՈՒԵՖԱ-ի Եվրոպա լիգայի խաղարկության որակավորման առաջին փուլի շրջանակում օգոստոսի 27-ին պայքարի մեջ կմտնի հայկական 3 ակումբ. «Շիրակը», «Նոան» ու «Ալաշկերտը»:

«Շիրակի» ու «Նոայի» մրցակիցներին արդեն անդրադարձել ենք:

Հիմա փորձենք հասկանալ, թե ով է «Ալաշկերտի» մրցակիցը.

Որակավորման երկրորդ փուլում պայքարին կմիանա ՉԼ-ի որակավորման առաջին փուլից դուրս մնացած Հայաստանի գործող չեմպիոն «Արարատ-Արմենիան»:

• Վիճակահանություն և հայ-մակեդոնական դիմակայությունների պամություն

Հերթական անգամ վիճակահանությամբ մեզ բաժին հասավ մակեդոնական ակումբ: «Ալաշկերտի» մրցակիցը մակեդոնական «Ռենովան» է: Նախորդ տարի ևս որակավորման առաջին փուլում «Ալաշկերտը» մրցեց մակեդոնական ակումբի հետ: «Մակեդոնիայի» հետ դիմակայությունում հայկական թիմն առավելության հասավ ընդհանուր 6-1 հաշվով: Ի դեպ, նախորդ տարի «Փյունիկը» ևս մակեդոնական թիմի հետ խաղաց. «Փյունիկի» զոհը «Շկուպին» էր: Դրան նախորդող տարում «Փյունիկը» առավելության էր հասել արդեն մակեդոնական «Վարդարի» նկատմամբ:

Տարիներ առաջ «Փյունիկը» մրցել էր մակեդոնական «Տետեկսի» ու «Պոբեդայի» հետ, 2 դեպքում էլ հաղթանակի էր հասել: Ի դեպ, «Ռենովայի» ներկայիս կազմից «Փյունիկ»-«Տետեկս» խաղին հայտավորված է եղել Նենադ Միշկովսկին:

2010/11 մրցաշրջանում Երևանի «Միկան» հանդիպեց մակեդոնական «Ռաբոտնիչկիին» և դիմակայությունում պարտվեց 0-1 հաշվով: Խաղ, որում հաղթանակը Երևան կբերեր անգլիական «Լիվերպուլին», սակայն «Գանձասար-Կապանի» ներկայիս գլխավոր մարզիչ Արմեն Պետրոսյանի մահացու դիրքերից 2 վրիպումը զրկեց մեզ նման հաճույքից: Ալեքսի վայր ընկնելուց հետո նշանակվեց, հետո՝ չեղարկվեց 11 մետրանոցը, Մինդաուգաս Գրիգալևիչուսի վրիպումը մոտ տարածությունից չգրավեց դատարկ դարպասը. հիշողություններ, հիշողություններ, հիշողություններ…

Այնուամենայնիվ, փորձը ցույց է տալիս, որ մեր թիմերը հաջող են հանդես գալիս մակեդոնական թիմերի դեմ խաղերում, սակայն պետք է հիշել, որ սա միայն վիճակագրություն է:

• Մրցակիցը

«Ռենովան», ինչպես և «Ալաշկերտը» երկարամյա պատմություն չունի: Ակումբը հիմնադրվել է 2001 թ-ին: Տնային մարզադաշտը կարող է ընդունել 15 հազար մարզասեր, բայց դա մեծ հաշվով մեզ այնքան էլ չի հետաքրքրում, քանի որ դիմակայության միակ հանդիպումը կայանալու է Երևանում՝ Վազգեն Սարգսյանի անվան Հանրապետական ստադիոնում,բայց, ցավոք՝ առանց երկրպագուների:

«Ռենովան» ներքին առաջնության չեմպիոն հռչակվել է մեկ անգամ՝ 2009/10 մրցաշրջանում: 2 անգամ դարձել է բրոնզե մեդալակիր, մեկ անգամ էլ տիրել է երկրի գավաթին: Նախորդ մրցաշրջանում թիմը, 23 խաղում վաստակելով 31 միավոր, գրավել է 4-րդ հորիզոնականը. 9 հաղթանակ, 4 ոչ-ոքի, 10 պարտություն: Թիմը արդյունավետությամբ այնքան էլ չի փայլել. 23 խաղում խփած 25 և բաց թողած 33 գնդակ: Տեղեկացնենք նաև, որ առաջնությունը դադարեցվել է կորոնավիրուսի պատճառով:

Հյ. Մակեդոնիայում նոր առաջնությունը ևս մեկնարկել է, և մեկնարկային 3 տուրում «Ռենովան» պարտություն չունի. 1 հաղթանակ և 2 ոչ-ոքի:

• «Ռենովան» Եվրոպայում

«Ռենովան» այս տարի իր պատմության մեջ 7-րդ փորձը կանի Եվրոպայում: Թիմը 2008-ին մասնակցել է Ինտերտոտոյի խաղարկությանն ու պայքարից դուրս մնացել երկրորդ փուլից: ՉԼ-ին մասնակցել է մեկ անգամ. 2010/11 մրցաշրջանում պայքարը սկսել է որակավորման երկրորդ փուլից ու դիմակայությունում 0-5 հաշվով պարտվել Նիկոսիայի «Օմոնիային»: 4 անգամ մասնակցել է ԵԼ-ի խաղարկությանը, որից միայն մեկ դեպքում է հաղթահարել որակավորման առաջին փուլի արգելքը: 2012/13 մրցաշրջանում անցնելով առաջին փուլը՝ երկրորդում ընդհանուր 1-2 հաշվով պարտվել է «Գոմելին»: 2015/16 մրցաշրջանից հետո առաջին անգամ «Ռենովան» մասնակցելու է ԵԼ-ին:

Ֆուտբոլիստների տրանսֆերային արժեքների հանրագումարով երևանյան թիմը կրկնակի անգամ գերազանցում է մրցակցին: «Ալաշկերտի» կազմը գնահատվում է 4 միլիոն 580 հազար եվրո, իսկ «Ռենովայինը»՝ 2 մլն 220 հազար եվրո:

• «Ռենովայի» կազմը

Թիմի կորիզը հիմնականում կազմում են տեղացի ֆուտբոլիստները: Կան լեգիոներներ Ալբանիայից, Կոսովոյից, Բոսնիայից ու Խորվաթիայից:

«Ռենովայի» գլխավոր մարզիչը Բույար Իսլամին է, որը մեկ տարի է, ինչ գլխավորում է թիմը:

• «Ալաշկերտ»

«Ալաշկերտը» հիմնադրվել է 1992 թ-ին: Մի քանի անհաջող փորձերից հետո ակումբը վերածնվեց 2011 թ-ին: Նախորդ 9 տարվա ընթացքում թիմը 3 անգամ դարձել է Հայաստանի չեմպիոն, մեկ անգամ՝ գավաթակիր և 2 անգամ՝ Սուպերգավաթակիր:

Թիմը 3 անգամ մասնակցել է ՉԼ-ի խաղարկությանը, որից 2-ում հաղթահարել է մեկական փուլ, իսկ 2018/19 մրցաշրջանում, դուրս մնալով ՉԼ-ի որակավորման առաջին փուլից, պայքարը շարունակեց Եվրոպա լիգայում, որտեղ հասավ մինչև երրորդ փուլ:

Նախորդ տարի Եվրոպա լիգայի որակավորման երկրորդ փուլում, «Ստյաուայի» դեմ խաղում թիմը մոտ էր սենսացիայի, սակայն մի փոքր չբավականացրեց:

Հայաստանի Նախորդ առաջնությունում «Ալաշկերտը» գրավեց երրորդ տեղը, իսկ ընթացիկ առաջնությունում 2 տուրից հետո ունի մեկ հաղթանակ, մեկ խաղ էլ ավարտել է ոչ-ոքի:

• «Ալաշկերտի» կազմը.

Մեր թիմում հիմնականում հանդես են գալիս լեգիոներներ: Հայտացուցակում ներառված 23 խաղացողից 9-ն ունեն Հայաստանի Հանրապետության քաղաքացիություն:

Նախորդ առաջնության ավարտին մոտ թիմի ղեկը ստանձնեց Ուկրաինական ֆուտբոլում թրծված, անվանի մասնագետ Եղիշե Մելիքյանը, և արդեն թիմի խաղում մեծ առաջընթաց է նկատվում: Նոր առաջնության մեկնարկից առաջ «Ալաշկերտը» համալրվեց բարձրակարգ լեգիոներներով ու տեղացի որակյալ ֆուտբոլիստներով: Կարելի է ասել՝ Հայաստանում «Ալաշկերտն» ամենազորեղ կազմն ունեցող 2 թիմերից մեկն է:

Այսպիսով, ամբողջ ինֆորմացիան ընդհանրացնելով, եթե փորձենք գնահատել թիմերի հնարավորությունները, ապա միանշանակ է, որ «Ալաշկերտը» խաղին կմոտենա ֆավորիտի կարգավիճակով:

• Մրցավարական անձնակազմը

Խաղը սպասարկելու է շոտլանդական մրցավարական բրիգադը` Նիկոլաս Վոլշի գլխավորությամբ: Եզրերում Վոլշին կօգնեն Կալում Սպենսը և Դուգլաս Պոտտերը: 4-րդ պաշտոնյան Էնդրյու Դալասն է:

Արմեն Գարամյան