Հայաստանի Բարձրագույն խմբի առաջնության վերջին տուրից օրեր անց հայտարարվեց «Շիրակում» մեծ փոփոխությունների մասին․ թիմի մի շարք խաղացողներ, Վարդան Բիչախչյանի գլխավորությամբ, տեղափոխվում են Երևանի «Արարատ»։ Մտավախությունը մեկն էր․ Եվրոպա Լիգայի շեմին՝ կկարողանա՞ն գյումրեցիներն այնպիսի կազմ հավաքել, որը ի զորու կլինի պայքար մղել այդ մրցաշարում։ Բայց, ինչպես հին ասացվածքն է փաստում, «Կարկուտը ծեծած տեղն է ծեծում»։ Եվրոպա Լիգայի վիճակահանությամբ «Շիրակին» բաժին հասավ ոչ ավել, ոչ պակաս Բուխարեստի «Ստյաուան» (ՖԿՍԲ)։
Ու թեև այս թիմը շատերին է հայտնի, բայց առաջարկում ենք ավելի մանրամասն ծանոթանալ մեր թիմի առաջիկա մրցակցին։
ՖԿՍԲ ՖԱ-ն, որը 1961-2017 թվականներին կոչվել է «Ստյաուա», մինչ օրս էլ երկրպագուների լայն շրջանակին հենց այդպես էլ հայտնի է։ Ի դեպ, ստյաուա ռումիներենից թարգմանած նշանակում է աստղ։
Ակումբը հիմնադրվել է 1947 թվականին ու այդ օրվանից հանդես է գալիս ռումինական Լիգա 1-ում՝ բարձրագույն խմբում։
Ինչո՞ւ ՖԿՍԲ և ոչ Ստյաուա
Իսկական Բուխարեստի «Ստյաուան» «ԿՍԱ Ստյաուա» սպորտային ակումբի մի մասն էր ու պատկանում էր ռումինական բանակին։ 1998 թվականին ակումբն ու դրա անդամները բաժանվեցին զինված ուժերից ու վաճառվեցին մի խումբ բաժնետերերի։ 5 տարի անց բաժնետերերից մեկը ձեռք բերեց դրա ողջ բաժնետոմսերը։ Այնուամենայնիվ, հենց նույն բանակը 2011 թվականին դատի տվեց ֆուտբոլային ակումբին` նշելով, որ այն նոր է կազմավորվել․ այդ օրվանից սկսած նրանք իրավական կոնֆլիկտի մեջ էին «Ստյաուա» բրենդի ու ակումբի նվաճումների շուրջ, ինչի արդյունքում՝ բազմաթիվ դատական գործերից հետո, 2017 թվականի սկզբներին ակումբը ստիպված եղավ հրաժարվել «Ստյաուա» անվանումից ու վերանվանվեց ՖԿՍԲ։
Նույն թվականին «Ստյաուա» բրենդը վերագործարկվեց ու նոր «Ստյաուան» սկսեց ելույթները Ռումինիայի առաջնության 4-րդ դիվիզիոնում։
Երկու տարի անց ռումինական դատարանի որոշմամբ՝ հիմնադրման 1947 թվականից մինչև 2003 թվականը ակումբի պատմական ժառանգության ողջ իրավունքները՝ ներառյալ 1986 թվականի Չեմպիոնների Գավաթի ու ՈՒԵՖԱ-ի Սուպերգավաթի հաղթանակները, ինչպես նաև մի քանի տասնյակ տեղի գավաթները, անցան 4-րդ դիվիզիոնում հանդես եկող նորակազմ «Ստյաուային»։ Իսկ ՖԿՍԲ-ին մնացին տիտղոսները, որոնք նվաճվել էին սկսած 2003 թվականից։
Այնուամենայնիվ, դատարանի վճիռը վերջնական չէ, Գերագույն դատարանը պետք է վերանայի ՖԿՍԲ-ի ներկայիս սեփականատերերի բողոքարկումները։
Նվաճումները
ՖԿՍԲ-Ստյաուան 26 անգամ դարձել է Ռումինիայի չեմպիոն, 23 անգամ՝ նվաճել երկրի Գավաթը, 2 անգամ՝ Լիգայի Գավաթը և 6 անգամ՝ դարձել Ռումինիայի սուպերգավաթակիր։
1986 թվականին նվաճել է Եվրոպայի Գավաթը և Եվրոպայի Սուպերգավաթը։
1989 թվականին նրանք ևս մեկ անգամ հասան Եվրոպայի Գավաթի եզրափակիչ, որտեղ զիջեցին իտալական «Միլանին»։
Իր պատմության ընթացքում թիմը խաղացել է նաև Միջմայրցամաքային Գավաթի եզրափակչում, Եվրոպայի Գավաթի Հաղթողների Գավաթի քառորդ եզրափակչում և ՈՒԵՖԱ-ի Գավաթի կիսաեզրափակչում։
Մարզադաշտը
ՖԿՍԲ-ն տնային խաղերն անցկացնում է «Արենա Նացիոնալա» մարզադաշտում, ուր տեղափոխվել է երկրի Պաշտպանության նախարարությանը պատկանող «Ստադիոնուլ Գենչա» մարզադաշտից։
«Արենա Նացիոնալան», որը տեղավորում է 55 634 հանդիսականի, ամենամեծ մարզադաշտն է Ռումինիայում։
Այս մարզադաշտում է իր տնային խաղերն անցկացնում նաև Ռումինիայի ազգային հավաքականը։ Այստեղ են անցկացվում Ռումինիայի Գավաթի եզրափակիչները։ Այն հանդիսանում է նաև ՖԿՍԲ-ի հավերժական մրցակից Բուխարեստի «Դինամոյի» տնային մարզադաշտը։
Հենց «Արենա Նացիոնալայում» էլ ռումինացիները օգոստոսի 27-ին կընդունեն Գյումրիի «Շիրակին»։
Երկրպագուները
«Ստյաուան» Ռումինիայում ամենամեծ թվով երկրպագուներն ունեցող թիմն է։ Ստյաուա Ուլտրաս շարժումը սկսվել է 1995 թվականին։
12-րդ խաղացողն այս անգամ, սակայն, COVID-19-ի սահմանափակումներով պայմանավորված, չի օգնի ռումինական թիմին, ուստի հավելյալ ճնշում մեր թիմի վրա տրիբունաներից չի լինի։
Հայկական թիմերի հետ խաղալու փորձը
2019 թվականին Եվրոպա Լիգայի որակավորման երկրորդ փուլում «Ստյաուան» բաժին էր հասել Երևանի «Ալաշկերտին»։ Երևանում կայացած առաջին խաղում մեր թիմը խոշոր՝ 0-3 հաշվով պարտություն էր կրել։ Բուխարեստում ալաշկերտցիները կարողացան հաջողության հասնել՝ հաղթելով 3-2 հաշվով։ Սակայն, դիմակայության ընդհանուր 3-5 պարտությամբ մեր թիմը դուրս մնաց հետագա պայքարից։
Հատկանշական է, որ «Ալաշկերտը» «փորձարկել» է նաև «Նոայի» այս տարվա մրցակից ղազախական «Կայրաթին»։ 2015 թվականին Եվրոպա Լիգայի որակավորման կրկին երկրորդ փուլում «Ալաշկերտը» ընդհանուր 2-4 հաշվով պարտությամբ լքել էր պայքարը։
Հնարավոր ամենաբարդ տաբերակը՝ «Շիրակին»
«Դե, հնարավոր տարբերակներից ամենաբարդը մեզ բաժին հասավ։ Միշտ էլ fortunan մեր ամենաուժեղ կողմը չի եղել։ Իհարկե, մեզ շատ դժվար հանդիպում է սպասվում, ամեն ինչ կանենք,որ պատվով դուրս գանք այդ մրցավեճից»,-վիճակահանությունից հետո ArmSport-ի հետ զրույցում ասել էր գյումրեցիների ավագ Աղվան Դավոյանը։
Մեզ մնում է սպասել և հուսալ, որ մեր թիմն ամեն դեպքում արժանի պայքար կմղի ուժեղ մրցակցի հետ՝ փորձելով քաղել առավելագույնը։
Ստելլա Բաբլոյան