Հայաստանի ազգային հավաքականի նախկին հարձակվող Էդգար Մանուչարյանը, որը վերջերս ավարտեց ֆուտբոլիստի կարիերան, կարող է ընդգրկվել ԲԿՄԱ-ի մարզչական շտաբում: Այս մասին ArmSport-ը տեղեկացավ հենց ակումբից:
Մանուչարյանը համագործակցում է ակումբի մարզչական շտաբի հետ, բայց դեռևս պաշտոնապես չի համալրել այն:
ԲԿՄԱ-ն Հայաստանի Առաջին խմբի առաջնության երկրորդ տուրի շրջանակում այսօր՝ օգոստոսի 22-ին, մրցել է «Ալաշկերտ-2»-ի հետ և 6-1 հաշվով հաղթանակ տարել: Մանուչարյանը ֆեյսբուքի իր էջում լուսանկար է հրապարակել ու մեկնաբանել այդ հաղթանակը.
«Լավ աշխատանք էր, տղաներ»,- գրել է Մանուչարյանը:
Նախորդ տուրում ԲԿՄԱ-ն 3-2 հաշվով առավելության էր հասել «Նորավանքի» նկատմամբ, ու այժմ վաստակած 6 միավորով գլխավորում է Առաջին խմբի մրցաշարային աղյուսակը:
Հիշեցնենք՝ 33-ամյա Մանուչարյանն օգոստոսի սկզբին հայտարարեց Հայաստանի հավաքականում կարիերան ավարտելու մասին՝ այդուհանդերձ ընդգծելով, որ մնալու է ֆուտբոլում.
«Հիմա իմ կյանքում սկսում եմ ուրիշ էտապ, միանշանակ մնալու եմ ֆուտբոլում ու ամեն բան անելու եմ՝ հնարավոր և անհնարին, որ իմ փորձով օգտակար լինեմ մեր ֆուտբոլին»,- գրել էր Մանուչարյանը: