Վարչապետ Նիկոլ Փաշինյանն այսօր Ազգային Ժողովի ամբիոնից իր տեսակետն է հայտնել «Մել» ֆիլմը ֆինանսավորելու որոշման վերաբերյալ.
«Այս մարդը վաստակ ունի մեր պատմության մեջ: Եթե մարդը տառապանք ունի, և իր միջավայրում անընդհատ կտրում են բաց վերքն ու աղ են լցնում վերքի մեջ ու ստիպում են, որ գնա երկրից, մենք խաչ ենք քաշում իր վրա: Երբ նա չեմպիոն է, մենք կկանգնենք նրա կողքին ու կհպարտանանք, իսկ երբ նա պրոբլեմ ունի, մենք նրա հետ գործ չունենք. իմ՝ Հայաստանի Հանրապետության մասին պատկերացումն այսպիսին չէ:
Ես տեղյակ չեմ եղել ֆիլմը ֆինանսավորելու որոշման մասին, բայց միայն ուրախ եմ, որ այդ ֆիլմը կայանալու է: Չմասնակցել այդ ֆիլմի ստեղծմանը՝ դա խարան է Հայաստանի Հանրապետության և նրա Կառավարության ճակատին: Ես գոհ եմ, որ ֆիլմը ֆինանսավորվելու է:
Այս ամենը ես համարում եմ էժանագին պրոպագանդա, այն կոռուպցիոն տաշտակից զրկված, լափամանից զրկվածների պրոպագանդա է:
Ես թույլ չեմ տա, որ ինչ-որ մեկը Հայաստանի Հանրապետության դրոշը բարձրացրած մարդուն գցի ոտքերի տակ, այդ մարդն իմ անձնական պաշտպանության ներքո է:
Ես գոհ եմ ու հպարտ, որ Մշակույթի նախարարությունն այդ որոշումը կայացրել է»,-ասել է վարչապետը:
