«Երևանը» VBet Հայաստանի Գավաթի խաղարկության 1/8 եզրափակչում այսօր՝ նոյեմբերի 2-ին մրցեց «Սևանի» հետ (0-2): Հանդիպման մեկնարկից առաջ ArmSport.am-ին հայտնի դարձավ, որ «Երևանի» հայ ֆուտբոլիստները հրաժարվում են մասնակցել խաղին:
«Երևանի» կազմում հայտավորված էր ընդամենը 1 հայ ֆուտբոլիստ՝ Աբրահամ Պորտուգալյանը, որը մեկնարկային րոպեներից մասնակցեց խաղին: Թիմի պահեստայինների կազմում ընդամենը 3 ֆուտբոլիստ էր՝ լեգեոներներ:
ArmSport.am-ին հայտնի է դարձել, որ ակումբը հայ ֆուտբոլիստներին 2 ամսվա աշխատավարձ է պարտք:
Ակումբում իբրև «սեփականատիրոջ մարդ» ներկայացող Կիրիլ Գրիգորովն արդեն տևական ժամանակ Հայաստանում չէ և հրաժարվում է կատարել հայ ֆուտբոլիստների՝ աշխատավարձի պարտքը մարելու պահանջը:
«Երևանը» Բարձրագույն խմբում արդեն կայացած 12 խաղերում պարտություն է կրել և զբաղեցնում է վերջին հորիզոնականը մրցաշարային աղյուսակում: Թիմն առաջնության մեկնարկից ի վեր արդեն 4-րդ մարզիչն է փոխել:
«Երևանում» տեղի ունեցող ոչ-պրոֆեսիոնալ երևույթների մասին կարող եք կարդալ թիմի նախկին մարզիչ Գեորգի Ղազարյանի հետ ArmSport-ի հարցազրույցում:
Նշենք, որ Հայաստանի առաջնությունում լեգեոներների «16+7» ձևաչափով լիմիտի ընդունումից հետո Առաջին խմբի խաղերում ոչ բավարար քանակով ՀՀ քաղաքացի հանդիսացող ֆուտբոլիստների հայտավորելու դեպքերում Կարգապահական Կոմիտեն ՀՖՖ պրոֆեսիոնալ ֆուտբոլի մրցումների անցկացման կանոնակարգի 25-րդ հոդվածի 6-րդ կետի, ՀՖՖ կարգապահական և էթիկայի կանոնակարգի 31-րդ հոդվածի 51-րդ կետի համաձայն ակումբներին հայտարարել է նկատողություն:
