Աստղային կիսապաշտպան Ջուդ Բելինգեմը հավատարիմ է մնում Մադրիդի «Ռեալին»՝ չնայած այլ բարձրակարգ ակումբների հետաքրքրությանն ու Սաուդյան Արաբիայի առաջնությունից չափազանց շահավետ առաջարկ ստանալու հնարավորությանը։
Ինչպես իր սոցիալական ցանցերում հայտնել է հայտնի ինսայդեր Էքրեմ Քոնուրը, անգլիացի ֆուտբոլիստն արդեն համաձայնեցրել է «սերուցքայինների» հետ համագործակցության երկարաձգման հարցը։ Աղբյուրի փոխանցմամբ՝ նոր պայմանագրով Բելինգեմի աշխատավարձը կկազմի տարեկան մոտ 30 միլիոն եվրո, ինչը տպավորիչ ֆինանսական թռիչք է նրա ներկայիս՝ մոտ 20-20,8 միլիոն եվրո աշխատավարձի համեմատ։
Նման պայմաններով 23-ամյա կիսապաշտպանը կմտնի եվրոպական ֆուտբոլի վարձատրության վերին էլիտա՝ հավասարվելով «Ռեալի» ամենաբարձր վարձատրվող ֆուտբոլիստների՝ Կիլիան Մբապեի և Վինիսիուս Ժունիորի մակարդակին (նրանք երկուսն էլ ստանում են մոտ 31-ական միլիոն եվրո բազային աշխատավարձ)։ Համեմատության համար նշենք նաև, որ «Մանչեսթեր Սիթիի» ռմբարկու Էրլինգ Հալանդի աշխատավարձը ևս գտնվում է նույն տիրույթում՝ կազմելով մոտ 32 միլիոն եվրո։
Հիշեցնենք, որ անգլիացու և «արքայական» ակումբի միջև գործող աշխատանքային համաձայնագրի ժամկետն ուժի մեջ է մինչև 2029 թվականի հունիսի վերջ։ Ներկայումս Բելինգեմի տրանսֆերային արժեքը շուկայում գնահատվում է 160 միլիոն եվրո։ Իսկ Լա լիգայի ընթացիկ մրցաշրջանում նա անցկացրել է 9 հանդիպում՝ դառնալով 3 գոլի և նույնքան արդյունավետ փոխանցման հեղինակ։
