Ֆրանսիայի ազգային հավաքականի նախկին հարձակվող Թիերի Անրին կիսվել է իր կարծիքով այն մասին, թե ով է արժանի ստանալու այս տարվա «Ոսկե գնդակը»։
«Նախորդ տարի ամեն ինչ շատ ավելի պարզ էր․ այն ժամանակ ակնհայտ ֆավորիտն Ուսման Դեմբելեն էր։ Հիմա ընտրություն կատարելը շատ ավելի բարդ է։
Վերցնենք, օրինակ, Հարի Քեյնին կամ Մայքլ Օլիսեին, որն ավարտված մրցաշրջանում Գերմանիայի լավագույն ֆուտբոլիստն էր։ Անգլիացիները, եթե նրանց հարցնեք աշխարհի առաջնության լավագույն ֆուտբոլիստի մասին, հաստատ կնշեն Ջուդ Բելինգեմին։ Թեև նրա մրցաշրջանը «Ռեալում» հաջողված անվանել չի կարելի։
Առանձին պետք է խոսել Ռոդրիի մասին․ նա իսկապես հիանալի էր աշխարհի առաջնությունում և իրավամբ արժանացավ մրցաշարի լավագույն խաղացողի կոչմանը։ Սակայն մրցաշրջանի ընթացքում նա այնքան էլ շատ հանդիպումներ չանցկացրեց։ Լամին Յամալն իր հերթին չկարողացավ բացահայտվել աշխարհի առաջնությունում՝ խանգարեց վնասվածքը։
Չի կարելի մոռանալ նաև Էրլինգ Հալանդի մասին․ բարդ է անտեսել ցանկացած դիրքից գոլ խփելու նրա ունակությունը։ Եվ այնուամենայնիվ, իմ կարծիքով, նա զիջում է որոշ այլ հավակնորդների։ Խվիչա Կվարացխելիան չմասնակցեց աշխարհի առաջնությանը, իսկ Լիոնել Մեսսին կարող էր լրջորեն հավակնել «Ոսկե գնդակին», եթե Արգենտինան հաղթեր մրցաշարում, բայց, ցավոք, դա տեղի չունեցավ։
Ի վերջո, ես հակված եմ Կիլիան Մբապեի թեկնածությանը. հենց նա է իմ ֆավորիտը։ Ոմանք կարող են առարկել, որ նա թիմային տիտղոսներ չի նվաճել, բայց նրա անհատական նվաճումներն ինքնին խոսուն են. նա դարձավ Չեմպիոնների լիգայի, Լա լիգայի և աշխարհի առաջնության լավագույն ռմբարկուն։ Մայքլ Օլիսեն նույնպես տպավորիչ է՝ հատկապես գոլային փոխանցումների քանակով։
Պարզապես մտածեք, թե քանի գոլ է խփել Մբապեն աշխարհի առաջնությունում և Չեմպիոնների լիգայում. դա ապշեցուցիչ է։ Ուզում եմ ընդգծել, որ բոլոր թեկնածուները լուրջ խաղացողներ են, այլ ոչ թե պատահական մարդիկ։ Սակայն անձամբ ես իմ ձայնը կտայի Կիլիանին։ Օլիսեն, անշուշտ, մակարդակով նույնպես շատ մոտ է նրան»,- Անրիի խոսքերը մեջբերում է Give me Sport-ը։
Հիշեցնենք, որ 2026 թվականի «Ոսկե գնդակի» հանձնման հանդիսավոր արարողությունը կկայանա հոկտեմբերի 26-ին:
