Միլանի «Ինտերի» գլխավոր մարզիչ Կրիստիան Կիվուն ամփոփել է Չեմպիոնների լիգայի լիգայի փուլի առաջին տուրում Մադրիդի «Ռեալի» դեմ կայացած արտագնա հանդիպումը, որում իտալական ակումբը զիջեց 1:2 հաշվով։
«Ես բնավ չեմ բարկանում։ Գոհ եմ իմ թիմից, տղաների դրսևորած խիզախությունից և բնավորությունից։ Սխալները ֆուտբոլի անբաժան մասն են, ինձ ավելի շատ հետաքրքրում է ռեակցիան՝ ինչպես է թիմն իրեն պահում դաշտում և ինչպես է հավատում իր ուժերին մինչև վերջին վայրկյանը։ Կասեի, որ սա մեզ համար լավ ելույթ էր. «Բեռնաբեուում» գերիշխելու մեր փորձն ինձ ուրախացնում է և լավատեսություն ներշնչում ապագայի հանդեպ։ Այսօր մենք մեզ հետ տանում ենք լավ խաղի տպավորություն. ոչ մի պահ չենք փորձել զուտ հաշվարկով խաղալ, գործել ենք բաց ֆուտբոլով՝ մրցակցին դեմ առ դեմ»,- նշել է Կիվուն։
Ռումինացի մասնագետը պաշտպանել է թիմի դարպասապահ Խոսեպ Մարտինեսին, ում՝ գնդակի կորստից հետո «Ռեալը» խփեց հաղթական գոլը.
«Ինչո՞ւ եք անպայման շեշտում Մարտինեսի անունը։ Ինձ նրա արձագանքն է հետաքրքրում, իսկ Պեպը շատ բարձր մակարդակով արձագանքեց՝ դրանից հետո կատարելով մի քանի կարևոր սեյվ։ Ինձ համար կարևոր են հպարտությունն ու բնավորությունը։ Այսօր կարող եմ վստահ ասել՝ մենք հիանալի հանդիպում անցկացրինք, որն ինձ մեծ վստահություն է հաղորդում»։
Կիվուն ջերմությամբ է հիշել «Ռեալի» գլխավոր մարզիչ Ժոզե Մոուրինյուին, ում գլխավորությամբ ժամանակին հանդես է եկել «Ինտերում».
«Ես շատ-շատ լավ եմ վերաբերվում Մոուրինյուին այն վստահության համար, որը նա ցուցաբերել է իմ հանդեպ ամենաբարդ պահերին՝ հատկապես մարդկային տեսանկյունից։ Անչափ գնահատում եմ նրան և լավագույնն եմ մաղթում այս նոր արկածախնդրության մեջ»։
Չեմպիոնների լիգայի հաջորդ տուրում «Ինտերը» հոկտեմբերի 13-ին Միլանում կընդունի բելգիական «Բրյուգեին»։
