Բաքվում ընթացող ըմբշամարտի Մ17 տարեկանների աշխարհի առաջնությունում 71 կգ քաշային կարգում ոսկե մեդալ նվաճած հայ ըմբիշ Ջանես Նազարյանը խոսել է իր հաղթանակի և մրցաշարի կազմակերպչական մակարդակի մասին։
Ադրբեջանական report.az կայքի փոխանցմամբ՝ մեր ըմբիշը նշել է, որ գոհ է իր գրանցած արդյունքից և բարձր է գնահատել մրցաշարի կազմակերպվածությունը։
«Տրամադրությունս շատ լավ է։ Մեզ այստեղ շատ ջերմ և բարձր մակարդակով են ընդունել։ Մրցաշարը լավ է կազմակերպված, իսկ մասնակիցներն էլ բավականին ուժեղ էին։ Ուրախ եմ հաղթանակիս համար»,- ադրբեջանական աղբյուրը մեջբերում է հայ մարզիկի խոսքերը։
Անդրադառնալով կազմակերպչական հարցերին՝ Նազարյանն ընդգծել է, որ հայկական պատվիրակությունը որևէ խնդրի չի բախվել․
«Բաքվում աշխարհի առաջնությանը մեր մասնակցության համար բոլոր անհրաժեշտ պայմանները ստեղծված էին։ Մեզ շատ լավ են ընդունել, տրվել են հարմարավետ նախապատրաստվելու և մրցելու բոլոր հնարավորությունները»,- նշել է աշխարհի նորընծա չեմպիոնը։
Հիշեցնենք, որ Ջանես Նազարյանը ոսկե մեդալակիր էր դարձել՝ վճռորոշ գոտեմարտում պարտության մատնելով Ռուսաստանի ներկայացուցիչ Ասլան Ձուևին։
