Մադրիդի «Ռեալի» կիսապաշտպան Օրելիեն Չուամենին հանդես է եկել պաշտոնական հայտարարությամբ՝ մեկնաբանելով թիմակից Ֆեդերիկո Վալվերդեի հետ տեղի ունեցած ծեծկռտուքի և ակումբի կողմից կիրառված խոշոր տուգանքի վերաբերյալ լուրերը։
Ինչպես հայտնի էր դարձել ավելի վաղ, միջադեպի պատճառով մադրիդյան ակումբը յուրաքանչյուր ֆուտբոլիստի տուգանել էր 500 հազարական եվրոյով։ Ֆրանսիացի ֆուտբոլիստը սոցիալական ցանցերի իր էջերում անդրադարձել է ստեղծված իրավիճակին և ներողություն խնդրել երկրպագուներից։
«Այս շաբաթ մարզման ժամանակ տեղի ունեցածն անթույլատրելի է։ Ասում եմ սա՝ մտածելով այն օրինակի մասին, որը մենք պետք է ծառայենք երիտասարդներին՝ լինի դա ֆուտբոլում, թե դպրոցում։ Անկախ նրանից, թե ով է ճիշտ, ով՝ մեղավոր, կոնֆլիկտը միշտ պետք է լուծել հնարավորինս հանգիստ։
Առաջին հերթին ցավում եմ այն բանի համար, թե ինչ լույսի ներքո մենք ներկայացրինք ակումբը։ Գիտեմ, որ երկրպագուները, անձնակազմը, թիմակիցներս և ղեկավարությունը խորապես հիասթափված են այս մրցաշրջանի ընթացքից։ Բայց հիասթափությունը չի կարող արդարացնել ամեն ինչ։ Նմանատիպ միջադեպերը, նույնիսկ եթե դրանք պատահում են ցանկացած հանդերձարանում, վայել չեն Մադրիդի «Ռեալին», հատկապես հաշվի առնելով, որ սա աշխարհի ամենաքննարկվող ակումբն է։
Համացանցում սիրում են հորինել ամենաաներևակայելի պատմությունները՝ հանուն ռեզոնանսի, ուստի պետք չէ հավատալ ասվածին կամ իրադարձությունների կեղծ վարկածներին»,- գրել է Չուամենին։
Կիսապաշտպանը նաև նշել է, որ ընդունում է իր սխալն ու կենտրոնանում առաջիկա կարևորագույն հանդիպման վրա.
«Այժմ արդեն ժամանակը չէ պարզելու, թե ով ինչ արեց, ով ինչ ասաց, և ով էր ճիշտ կամ մեղավոր։ Ընդունում եմ ակումբի պատժամիջոցները և հարգում եմ նրանց որոշումը։ Մենք շարունակում ենք ընտանիք մնալ՝ չնայած տարաձայնություններին, սակայն թիմի նպատակները պետք է վեր դասենք մնացած ամեն ինչից։
Ես արդեն ներողություն եմ խնդրել թիմից և ցանկանում եմ ներողություն խնդրել նաև բոլոր մադրիդիստներից։ Այժմ առաջ շարժվելու ժամանակն է։ Մեր ողջ ուշադրությունը կենտրոնացած է «Էլ Կլասիկոյի» և մրցաշրջանի մնացած հատվածի վրա, որպեսզի ակումբը վերադարձնենք այնտեղ, որտեղ նրա տեղն է՝ գագաթին»,- եզրափակել է Չուամենին:
Հիշեցնենք, որ այս կիրակի Մադրիդի «Ռեալը» Իսպանիայի առաջնության շրջանակում արտագնա խաղում ուժերը կչափի Լա Լիգայի առաջատար կատալոնական «Բարսելոնայի» հետ:
