Ժոզե Մոուրինյուն երկրորդ անգամ կմրցի Մադրիդի «Ռեալի» դեմ՝ «Արքայական ակումբից» հեռանալուց հետո։ Այս անգամ նրա մրցակիցը կլինի իր ամենահայտնի սաներից մեկը՝ Ալվարո Արբելոան, ում պորտուգալացի մասնագետը առանձնահատուկ ջերմությամբ է վերաբերվում։
«Բենֆիկայի» գլխավոր մարզիչը նախախաղային մամուլի ասուլիսում խոսել է իր նախկին սանի, Խաբի Ալոնսոյի պաշտոնանկության և առաջիկա կարևոր հանդիպման մասին։
«Նա լավագույն ֆուտբոլիստը չէր, բայց լավագույն մարդկանցից էր»
Մոուրինյուն հերքել է այն ենթադրությունները, թե անփորձ մարզիչների մասին իր նախկին հայտարարությունը ուղղված է եղել Արբելոային։
«Արբելոան իմ տղան է, նա պարզապես իմ նախկին ֆուտբոլիստը չէ։ Անձնական հարթության վրա Ալվարոն իմ ամենասիրելի խաղացողներից է։ Նա «Ռեալում» իմ ունեցած լավագույն ֆուտբոլիստը չէր, բայց միանշանակ լավագույն մարդկանցից մեկն էր։ Նա վերջին մարդն է, ում ես կցանկանայի ճնշման ենթարկել», — նշել է Մոուրինյուն։
Մոուրինյուն հիշել է նաև իր մարզչական կարիերայի սկիզբը «Բենֆիկայում» 2000 թվականին՝ զուգահեռներ անցկացնելով Արբելոայի ներկայիս իրավիճակի հետ, երբ երիտասարդ մասնագետը անմիջապես գլխավորում է գրանդ ակումբ։
«Ես հույս ունեմ, որ Ալվարոյի գործերը շատ լավ կդասավորվեն, և նա ֆանտաստիկ կարիերա կունենա։ «Ռեալը» Արբելոայի գլխավորությամբ… պատկերացրեք, թե որքան շատ եմ ուզում, որ նա հաջողության հասնի։ Միայն վաղը եմ ցանկանում, որ նրա բախտը չբերի։ Իսկ դրանից հետո՝ թող միշտ հաղթի», — հավելել է պորտուգալացին։
Խաբի Ալոնսոյի և «Բենֆիկայի» խնդիրների մասին
Անդրադառնալով «Ռեալի» նախկին մարզիչ Խաբի Ալոնսոյի հեռանալուն՝ Մոուրինյուն ասել է.
«Խաբին ևս իմ տղաներից է, և նրա մասին ունեմ միայն դրական հիշողություններ։ Ինձ համար հուզիչ էր խաղալ Խաբիի դեմ, ինչպես վաղը հուզիչ կլինի խաղալ Ալվարոյի դեմ։ Ֆուտբոլում ինձ դժվար է զարմացնել, ամեն ինչ կարող է պատահել։ Բայց վստահ եմ, որ նրա կարիերան կշարունակվի այլ ուղղությամբ, և նա երջանիկ կլինի, քանի որ «Լեվերկուզենում» նա ապացուցեց իր բարձր կարգը»։
Խոսելով վաղվա խաղի մասին՝ Մոուրինյուն ընդգծել է, որ «Բենֆիկային» միայն հաղթանակ է պետք փլեյ-օֆֆ դուրս գալու հույսերը պահպանելու համար․
«Մեր միակ նպատակը հաղթելն է։ Եթե չհաղթենք, այլևս հաշվարկներ անելու կարիք չի լինի։ Պարտությունն ու ոչ-ոքին մեզ դուրս են թողնում պայքարից»։
