UFC-ի գործադիր տնօրեն Դանա Ուայթը մեկնաբանել է թեթև քաշային կարգում ժամանակավոր տիտղոսի համար Ջասթին Գեյջի — Փեդի Փիմբլեթ զույգի ընտրությունը, որը կայացվել է ի վնաս դիվիզիոնի առաջին համար Արման Ծառուկյանի։
Հիշեցնենք, որ Փիմբլեթի և Գեյջիի մենամարտը գլխավորելու է UFC 324 մրցաշարը, որը կայանալու է հունվարի 25-ին։
«Արմանի մասնակցությամբ մի քանի միջադեպ է եղել (ծիծաղում է): Մեկից ավելի… Եվ Արմանը տիտղոսի համար պայքարելու հնարավորություն ուներ: Կասկած չկա, որ Ծառուկյանն այս պահին աշխարհում թիվ մեկն է: Բայց նա ուներ իր շանսը…
Սա ուղերձ չէ մյուս մարտիկներին, որպեսզի հետևեն իրենց վարքագծին: Ոչ մի ուղերձ էլ չկա: Այս բիզնեսում շատ խենթ բաներ են տեղի ունենում: Արմանը ամեն ինչ գիտի: Սա այն ամենն է, ինչ պետք է ասել այս թեմայով: ԶԼՄ-ները սիրում են քննարկել այս իրավիճակը, բայց Արմանին ոչինչ բացատրել պետք չէ»,- ասել է Ուայթը Դիանա Բելբիտային տված հարցազրույցում:
Հիշեցնենք, որ 2025 թվականի հունվարին նախատեսված էր Արման Ծառուկյանի և Իսլամ Մախաչևի ռևանշը՝ թեթև քաշային կարգում չեմպիոնական գոտու համար, սակայն կշռման օրը հայ մարզիկը մեջքի վնասվածքի պատճառով ստիպված էր հրաժարվել մենամարտից:
Ծառուկյանը վերջին անգամ օկտագոն է դուրս եկել 2025 թվականի նոյեմբերին՝ UFC Fight Night 265-ում մրցելով Դեն Հուկերի դեմ: Այդ մենամարտն ավարտվել է Արմանի հաղթանակով՝ երկրորդ ռաունդում կիրառած խեղդող հնարքով: Նրա ակտիվում կա 23 հաղթանակ և երեք պարտություն:
